Монгол, Оросын эрхэм хүндэт ахмад дайчид аа,
Эрхэм зочид төлөөлөгчид өө,
Халхын голын байлдааны ялалтыг гардан зохион байгуулж, удирдсан гарамгай жанжин Г.К.Жуковын хөшөөнд Оросын Холбооны Улсын Ерөнхийлөгч Д.А.Медведевийн хамт гүн хүндэтгэл илэрхийлэх энэ мөчид тэрхүү түүхт ялалтыг байгуулахад мөр зэрэгцэн тулалдаж явсан Монгол, Оросын ахмад дайчид Та бүхэндээ Монгол Улсын төрийн дээд шагнал гардуулж байгаадаа туйлын баяртай байна.
Монгол Улсын тусгаар тогтнол, бүрэн эрхт байдлын төлөө амь насаа үл хайрлан цэл залуу насаа зориулсан Та бүгдийн гавъяа Монголын ард түмний сэтгэл зүрх, Монголын үе үеийн төр засгийн оюун мэлмийд үүр мөнхрөн дурсагдах болно.
Манай орны хөгжил цэцэглэлтийн төлөө хөлс хүчээ шавхан хөдөлмөрлөж байсан оросын мянга мянган хөвгүүд, охидыг манай ард түмэн ямагт сайнаар дурсаж хүндэтгэж явдгийг энэ дашрамд тэмдэглэн хэлмээр байна.
Энэхүү түүхт ойн баярыг тохиолдуулан Та бүхэндээ урт удаан насалж, энх тунх аж төрөхийг хүсэн ерөөе!
Энх тайван, эрх чөлөө үүрд мандан бадраг!
