Мэргэжлийн сургалт үйлдвэрлэлийн төвд зочлов
Монгол улсын хамгийн отгон гэж хэлж болох мэргэжил сургалт үйлдвэрлэлийн төв Булган аймгийн төвд үйл ажиллагаагаа эхлээд удаагүй байна.
Өнгөрсөн оны аравдугаар сарын нэгнээс сургалтын үйл ажиллагаа эхэлж, өнөөдөр сүү сүүн бүтээгдэхүүний үйлдвэрлэл, сүү ариутгах хөргөх операторчин, ойн мэргэжлийн ажилчин, хөдөө аж ахуйн машин тоног төхөөрөмжийн засварчин, гэр ахуйн цахилгаан хэрэгсэл, сэргээгдэх эрчим хүчний тоног төхөөрөмжийн засварчин, цахилгаанчин гэсэн үндсэн мэргэжлийн ажилчин бэлтгэж байна. Ес арваннэгдүгээр анги төгссөн буюу бүрэн дунд боловсролтой иргэд нэгээс хоёр аравны таван жил суралцаж бүрэн боловсрол эзэмшихийн зэрэгцээ хөдөө аж ахуйн нарийн мэргэжитэй болж төгсөх юм байна. Одоогор энэ сургуульд Улаанбаатар, Даррхан, Эрдэнэт,Архангай, Өвөрхангай, Булган аймгийн бүх сумдаас оюутан сурагчид ирж суралцаж байна.Цаашдаа бүс нутагт өрсөлдөх хэмжээний чадвартай хөдөө аж ахуйн нарийн мэргэжлийн боловсон хүчин бэлтгэн гаргах зорилттой ажиллаж байна. Булган аймаг нь улсын хэмжээнд хөдөө аж ахуйн загвар аймаг болох зорилтыг дэвшүүлэн ажиллаж байгаа бөгөөд энэ зорилтыг хангахад манай сургуулиас төгссөн боловсон хүчин чухал үүрэгтэй гэдэгт бид итгэлтэй байна гэж тус сургуулийн захирал С.Оюунбат ярилаа. Одоогийн байдлаар тус сургуульд 120 оюутан сурагч суралцаж дотуур байранд 70 гаруй хүүхэд амьдарч байна.Оюутанууд сарын 45000 төгрөгийн тэтгэмж авдаг ба гар дээрээ цалин авах нь хариуцлагатай болгож байна гэж багш нар ярьж байна. Тухайлбал хичээл завсардах, таслах гэх мэтийн зохисгүй явдал гарахгүй байна.
Энэ сургуулийг байгуулахад УИХ гишүүн Э.Мөнх-Очир Улсын Их Хурлаас хуваарилсан тэрбум төгрөгөөрөө санхүүжилтийн дэмжлэг үзүүлсэн байна.Энэ сургууль аж ахуйн нэгж компаинудтай гэрээ байгуулж оюутан сурагчидаа дадлага хийлгэхээр болсон. Түрүүчээсээ ойн мэргэжлийн, сүү сүүн бүтээгдэхүүний чиглэлээр сурч байгаа оюутан сурагчид дадлагатаа гарч эхлээд байна.Ажлын байрны захиалга ч ирж эхэлсэн байна. Тиймээс тус сургуулийг төгсөгчид ажлын байраар 100 хувь хангагдана гэдэг сургуулийн удирдлага итгэлтэй байна хэмээн хэллээ.
Монгол Улсын Ерөнхийлөгч тус сургуультай танилцах үеэрээ “Өнөөдөр мэргэжлийн сургууль төгсөгчдийн арван хүүхэд тутмын найман нь ажилтай болдог. Гэтэл их дээд сургууль төгсөгчдийн найм нь ажил хайдаг. Өөрөөр хэлбэл манай улсад мэргэжилтэй ажилчин ямар их шаардлагатай байгааг энэ тоо баримт харуулж байна. Ядуурлыг арилгах гол хүчин зүйл бол хүмүүс орлоготой болох явдал. Орлогтой байхын тулд мэргэжилтэй байх хэрэгтэй. Ийм учраас манай улсад мэргэжлийн сургалт үйлдвэрлэлийн төв байгуулахыг төр засгийн түвшинд бүх талаар дэмжин ажиллана. Эдийн засгийн гол салбар хөдөө аж ахуй, газар тариалан мэргэжлийн боловсон хүчин бэлтгэх нь боловсролын салбарын тэргүүлэх чухал үүргийн нэг юм” гэлээ.
Мэргэжлийн сургалт үйлдвэрлэлийн төвд зочлов
