МОНГОЛ УЛСЫН ЕРӨНХИЙЛӨГЧИЙН МЭНДЧИЛГЭЭ
“Мянган ээжийн чуулган”-д оролцогчдод
Эрхэмсэг эмэгтэйчүүд, алдарт эхчүүд ээ,
“Алдарт Эхийн Одонт Ээжүүдийн холбоо”- ноос уламжлал болгон зохиодог энэхүү чуулганд оролцож байгаа алдарт эхчүүд Та бүхэндээ болон эх орныхоо өнцөг булан бүрт суугаа мянга мянган ээжүүддээ “Олон улсын эмэгтэйчүүдийн эрхийг хамгаалах өдөр”-ийн халуун мэндчилгээг дэвшүүлж байна.
Та бүхэн маань Монгол орныхоо хөгжил дэвшил, үр хүүхдийнхээ сайн сайхны төлөө өөрийн биеийн алжаалыг үл хайхран зүтгэж, уйгагүй хөдөлмөр, уужуу талбиу ухаанаараа улс гүрэн, ураг бүлийнхээ түшиг тулгуур болж ирсэн билээ.
Одонт ээжүүдийн маань дунд алтан гартай эмч, ачит багш, сурган хүмүүжүүлэгчид, үйлс өгөөмөр үйлдвэр, үйлчилгээний ажилтнууд, цас зуданд үл шантрагч малчид, арвин их ургацын эзэн тариаланчид гээд үр хүүхэд, хойч үедээ үлгэр дуурайлал үзүүлэн насны буянаа эдэлж, төр засаг, түмэн олныхоо хүндлэлийг хүлээсэн олон сайхан ээжүүд бий.
Нийгмийн хөгжилд эмэгтэйчүүдийн оролцоо нь туйлын чухал бөгөөд хүн амын өсөлт, улс орны хөгжил, ирээдүй хойч үе чухамхүү эхчүүдээс хамаардаг. Эх хүн хорвоогийн энэрэл хайрын далай уужим сэтгэл, ариун цагаан сүүгээрээ амьдралыг тэтгэгч төдийгүй улс гэрийн тооныг тулагч хос баганы нэг нь билээ. Эхийн сэтгэл бол гэгээн нигүүлсэл дүүрэн, бүхий л хайрын эхлэл байдаг. Хүмүүнийг төрүүлж өсгөн хүмүүжүүлэхэд эх хүний гавьяа хосгүй бөгөөд энэ их ач буяныг төр үнэлж дэмжих ёстой. Шинэ мянган гарсаар Монгол улс улам өнөр болж хүн амын төрөлт нэмэгдэх боллоо. Ийм үед манай төр засаг эмэгтэйчүүд, эхчүүдийн эрүүл мэндийг хамгаалан тэднийг дэмжих бодлогоо өргөжүүлэн тэлж, амаржих газрын хүрэлцээ хангамжийг шинэ зууны шаардлагад нийцүүлэн нэмэгдүүлэх, эмнэлгийн тусламж, үйлчилгээг шуурхай, оновчтой болгох чиглэлийг барин ажиллаж байна.
Миний бие шинэ он гарах торгон агшинд Монгол түмэнтэйгээ сүү өргөн мэндчилж, “Архигүй Монголын төлөө хамтдаа” уриалгыг дэвшүүлсэн билээ. Энэхүү уриалгыг Монголын эхчүүд сэтгэл хөдлөн халуун дотноор хүлээн авч, архигүй Монголын төлөө өөрсдөөрөө үлгэрлэн нэгдсээр байна. Тухайлбал: Цагаан сараа архигүй ёслон өнгөрөөсөн ээжүүд, ээждээ сүү барин золгосон хүүхдүүд, баяр ёслол, тэмдэглэлт өдрүүдийг архигүйгээр тэмдэглэсэн хамт олны түрлэг бий болж буй нь сайшаалтай.
Монгол эхийн цагаан сүүгээр амалж өссөн эрдэнэт хүмүүний бие архи дарснаас ангид байж, эрүүл чийрэг бие бялдар, саруул цэлмэг оюун ухаанаараа ирээдүйн сайн сайхныг цогцлоох болтугай.
Буянт ээжүүд та бүхэндээ улс гүрнийхээ мандал бадралын галыг хөгжөөж, төрдөө түшигтэй, түмэн олондоо хүндтэй, жаргалын дээдийг эдлэн, амар амгалан амьдрахын өлзийтэй ерөөлийг өргөн дэвшүүлье.
Монголын мянга мянган эхчүүдийг
Мөнх хөх тэнгэр ивээх болтугай.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
2011 оны 3 дугаар сарын 8-ны өдөр
