Монгол Улсын Ерөнхийлөгч Ц.Элбэгдорж Булган аймагт ажиллах үеэрээ “Их санаачилга” хуримтлалын бүлгийн үйл ажиллагаатай танилцлаа. Иргэд айл хөршөөрөө, хамт олноороо нэгдэн бүлэг болж, багахан мөнгөөр хуримтлал үүсгэж, сан бий болгон тохьтой тухтай амьдрах орчин нөхцөлөө өөрсдөө сайжруулдаг хуримтлалын бүлгийн үйл ажиллагаа өнгөрсөн жилээс идэвхжиж байгаа билээ.
Монгол Улсын Ерөнхийлөгч өнгөрсөн жил хуримтлалын бүлгийн үйл ажиллагааг дэмжих, ийм идэвхи санаачилгыг орон даяар өрнүүлэх тухай зарлиг гаргасан. Энэ дагуу орон нутагт хуримтлалын бүлгүүд олноор байгуулагдаж байна. Булган аймгийн хэмжээнд өнөөдөр 6 хуримтлалын бүлэг ажиллаж байна.
Хуримтлалын бүлэг үүсгэж амьдарснаас хойш гэрт нь, оршин суугаа газарт нь, хөрш айлд нь сайн сайхан дэвшил өөрчлөлтүүд гарч байгаа талаар иргэд ярьж танилцууллаа.
“Их санаачилга” бүлэг 16 өрхийн 80 гишүүнтэй. Өдөрт 100 төгрөгийн хуримтлалаар сан үүсгэж, оршин суугаа орчин тойрноо тохижуулах, цэвэрлэх, өнгө зүсий нь засахаас ажлаа эхэлжээ. “Хүүхдийн тоглоомын талбай тохижуулсны дараа эцэг эхчүүд хүүхдүүдээ хаанаас хайхаа мэддэг болсон. Бид өөрсдөдөө байгаа банз, хадаасаа нийлүүлж энэ тоглоомын талбай, ахмадууд суух саравч зэргийг барилаа. Бас хурлаа хийж, ажлаа ярьж байх байртай болсон. Манай хуримтлалын бүлгийнхэн голдуу тэтгэврийн хөгшид. Өндөр настнууд идэвхтэй амьдарч, асуудлаа шийдэхэд оролцдог болсондоо туйлын баяртай байдаг” гэж тус хуримтлалын бүлгийн ахлагч Д.Санжаажамц ярив.
“Монголчууд дэм дэмэндээ, дээс эрчиндээ гэдэг. Бид хөрш айлдаа дэм болж, даргаас гуйхгүйгээр өөрсдөө асуудлаа шийдэж амьдарч байна. Үүсгэсэн хуримтлалаараа жижиг үйлдвэрлэл эрхлэх, шаардлагатай байгаа гишүүддээ зээл өгөх зэргээр ажиллаж байна” гэж иргэн Чойжмаа ярилаа.
Ерөнхийлөгч өнгөрсөн жил Төв аймгийн Баянчандмань суманд ажиллах үеэрээ хуримтлалын бүлгүүдийн үйл ажиллагаатай танилцаж, энэхүү үүсгэл санаачилгыг дэмжих хэрэгтэй юм байна гэж шийдсэнээ яриад,бүлгээрээ хоршиж ажиллаж амьдрахыг орон нутгаас дэмжих хэрэгтэй гэв.
