Д.А.Медведев: Манай хоёр ард түмэн, дайчин нөхөрлөлийн хүчийг дэлхий дахинд харуулсан билээ.
Монгол Улсын Ерөнхийлөгч Ц.Элбэгдорж, ОХУ-ын Ерөнхийлөгч Д.А.Медведев нар өнөөдөр Халхын голын байлдааны ялалтын 70 жилийн ойн баярын хуралд оролцож үг хэллээ.
Ерөнхийлөгч Ц.Элбэгдорж :
“Халхын голын байлдааны ялалт бол Монгол Улсын тусгаар тогтнол, бүрэн эрхт байдал, монголын ард түмний эрх чөлөөг хамгаалахын төлөө, нийтийн дайны эсрэг хийсэн хамтын тэмцлийн нандин түүх мөн. Энэ ялалтанд хүрэхэд ЗХУ, оросын ард түмний зүгээс үзүүлсэн цэрэг-техникийн тусламж шийдвэрлэх үүрэг гүйцэтгэснийг монголын ард түмэн хэзээ ч мартахгүй...Монгол орны тусгаар тогтнол, бүрэн эрхт байдлыг батлан хамгаалахын төлөө халуун амь, бүлээн цусаа үл хайрлан баатарлаг гавъяа байгуулж, амь насаа зориулсан монгол, зөвлөлтийн дайчид, түүнчлэн өдгөөг хүртэл бидэнд үлгэр дууриал, амьд түүх болж яваа азай буурал ахмад дайчид Та бүхэндээ Монгол Улсын Ерөнхийлөгч, Зэвсэгт хүчний Ерөнхий командлагчийн хувьд гүн хүндэтгэл илэрхийлье.
Халхын голоос 1939 онд гэртээ буцаж ирээгүй монгол, орос цэрэг эрсийн гэгээн дурсгал монголын ард түмний сэтгэл зүрх, Халхын голд мөнхөд хадгалагдан үлдэх учиртай” гэлээ.
Ерөнхийлөгч Д.А.Медведев хэлэхдээ:
“ Халх голын байлдааны ялалтын 70 жилийн ойн баярт оролцож байгаадаа би баяртай байна...Богино хугацаанд болсон ширүүн тулалдаанд эх орноо баатарлагаар хамгаалж чадсан түүхийг манай хоёр орны ард түмэн мартахгүй. Энэ бол гуйвуулшгүй үнэн түүх.
Халхын голын тулалдаанд бид ялснаар, зөвхөн зэр зэвсгийн хүч төдийгүй дайчин нөхөрлөлийн хүч чухал гэдгийг дэлхий дахинд харуулсан билээ...Өнөөдрийн баяр бол хоёр ард түмний баатарлаг гавъяаг эх орон ард түмэн нь нандигнан хадгалж байгаагийн илрэл” гэлээ.
Баярын хуралд мөн Батлан Хамгаалахын сайд Л.Болд илтгэл тавьж, ОХУ-ын Зэвсэгт Хүчний Жанжин Штабын дарга, Батлан Хамгаалахын сайдын нэгдүгээр орлогч Н.Г.Макаров, Монгол Улсын Баатар, ахмад дайчин Д.Гунгаа нар үг хэллээ. Хоёр орны Төрийн тэргүүн Халхын голын байлдааны ялалтын 70 жилийн ойн Баярын хуралд оролцож үг хэлсний дараа, хүндэтгэлийн концерт үзэж сонирхлоо.
