Монгол Улсын Ерөнхийлөгчийн Тамгын газар,ҮАБЗ-ийн ажлын алба хамтран “Иргэдийг хүн худалдаалах гэмт хэрэгт өртөхөөс хамгаалах асуудал” сэдэвт хэлэлцүүлэг “Иргэний танхим”-д өнөөдөр зохион байгууллаа.
Хэлэлцүүлэгт Нийгмийн хамгаалал, хөдөлмөрийн яамны төрийн нарийн бичгийн дарга У.Бямбасүрэн “Хүн худалдаалах гэмт хэргээс иргэдийг хамгаалах, урьдчилан сэргийлэх үйл ажиллагаа”, Хууль зүй, дотоод хэргийн яамны ахлах мэргэжилтэн Б.Бат-Амгалан “Хүн худалдаалах гэмт хэрэгтэй тэмцэх эрх зүйн орчинг боловсронгуй болгох нь”, ЦЕГ-ын мэдээлэл, судалгааны төвийн дарга Ж.Бумнанжид “Хүн худалдаалах гэмт хэргийн шалтгаан нөхцөл, түүнтэй тэмцэх үйл ажиллагаанд анхаарах зарим асуудал”, Нийслэлийн шүүхийн ерөнхий шүүгч Б.Сарантуяа “Хүн худалдаалах, биеэ үнэлэхэд бусдыг татан оруулах, биеэ үнэлэхийг зохион байгуулах гэмт хэргийг шүүхээр хянан шийдвэрлэсэн байдал”, Хүний аюулгүй байдлын судалгааны төвийн захирал Л.Эрдэнэчулуун “Хүн худалдах гэмт хэрэгтэй тэмцэхэд төрийн болон төрийн бус байгууллагуудаас цаашид хийх үйл ажиллагааны чиглэл ба зорилт”, Хүний эрхийн үндэсний комиссын гишүүн П.Оюунчимэг “Хүн худалдаалах гэмт хэрэг ба хүний эрх, эрх чөлөөний баталгаа, хамгаалал”, Хүйсийн тэгш эрхийн төвийн ажилтан Цогзолмаа “Хүн худалдаалах гэмт хэргийн хохирогчийг хамгаалах, хохирлыг нөхөн төлүүлэх асуудал” сэдвээр тус тус илтгэл тавьж, оролцогчид санал солилцов.
Илтгэгчдийн хэлж буйгаар энэ гэмт хэрэг Монголд нэлээд хурдацтай газар авч байгаа бололтой. Гурван жилийн өмнөх судалгаагаар хүмүүсийн 17-40 хувь нь сонссон гэж хариулсан бол өдгөө 91 хувь нь мэднэ, 88 хувь нь нийгмийн тулгамдсан асуудал гэсэн байх юм. Өнөөдөр Монголд төрийн бус 30 байгууллага 10 хандивлагч орны санхүүжилтээр 10 гаруй төсөл, хөтөлбөр хэрэгжүүлж байна. Хүн худалдаалах, биеийг нь хүчээр үнэлүүлэх гэмт хэрэгт монголын охид, эмэгтэйчүүд өртөж, Хятад, Малайз, Сингапур, Япон, Индонез, Герман, Солонгос, Турк, Тайландад хүргэгдсэн мэдээлэл байдаг ажээ. Зөвхөн Эрээнд гэхэд янхны газар 10 бий гэх бөгөөд тэдгээрт монгол охид биеэ үнэлж буй юм байна. Энэ төрлийн гэмт хэрэгт 1961 оноос хойш хэдэн хүн холбогдож байгаа талаар цагдаа, шүүхийнхэн тоо гаргажээ. Тухайлбал биеийг нь үнэлүүлсэн, худалдсан 141 гэмт хэрэгт 243 хүн холбогдож, шүүхээр шийтгэгдсэн байна. Үүнээс хүн худалдсан 14 хэрэгт 25 хүн холбогдон шийтгүүлж, хохирогч нь 82 болсон байна. Бодлого, үйл ажиллагаа, хөрөнгө хүчээ төрийн болон төрийн бус байгууллагууд нэгтгэж тэмцэн цогцоор асуудалд хандах хэрэгтэй байна гэж илтгэгчид ярилаа.
Хэлэлцүүлэгт оролцогчид ҮАБЗ-д санал зөвлөмж гаргаж өгөх, энэ гэмт хэргийн талаар бие даасан хууль гаргах, түүнийг “Иргэний танхим”-аар хэлэлцүүлэх нь зүйтэй гэж үзэв. Түүнчлэн 2005 онд батлагдсан Үндэсний хөтөлбөрийг хүүхдэд голлон анхаарч эмэгтэйчүүдийг орхигдуулсан тул өөрчлөн шинэчлэх, хил хамгаалах, цагдаа, бүртгэлийн болон гадаадын иргэдийн асуудал хариуцсан байгууллагын ажлын уялдааг хангах, мэдээллийг нь сүлжээнд нэгтгэх хэрэгтэйг ч тэд онцлон тэмдэглэв.
