Ерөнхийлөгчийн Ахлах зөвлөх П.Цагаан АНУ-ын Олон Улсын Хөгжлийн Агентлагийн ажлын хэсэгтэй уулзав
2010 оны 8 дугаар сарын 25-ны өдөр Монгол Улсын Ерөнхийлөгчийн ахлах зөвлөх П.Цагаан тус улсад ажлын айлчлал хийж буй АНУ-ын ADR Inc. байгууллагын төлөөлөгчидтэй уулзлаа. Тус байгууллагын төлөөлөгчид АНУ-ын Олон Улсын Хөгжлийн Агентлагаас /USAID/ хийж буй “Монголын Ардчилал, эдийн засгийн хөгжлийн өнөөгийн байдалд үнэлэлт, дүгнэлт өгөх хөтөлбөр”-ийг боловсруулах ажлын хүрээнд Монгол Улсад ирээд байгаа юм.
Ахлах зөвлөх П.Цагаан, Монгол Улс сүүлийн хорин жилд шилжилтийн шатандаа яваа ижил төстэй бусад орнуудтай харьцуулбал Ардчилсан нийгэм байгуулахад ихээхэн амжилт олсон бөгөөд үүнд USAIDзэрэг олон улсын байгууллагуудын дэмжлэг, туслалцаа ихээхэн үүрэг гүйцэтгэснийг талархан дурдаж, цаашид үзүүлж болох хамгийн бодит туслалцаа бол хөрөнгө оруулалт, чадвахи бий болгоход туслах явдал гэдгийг онцлон тэмдэглэв.
Тэрээр тус улсад Ардчилсан нийгмийг төлөвшүүлэхийн тулд олон зүйлд анхаарлаа хандуулах хэрэгтэй байгааг, тухайлбал шүүхийн шинэтгэлийг гүнзгийрүүлэх, Төрийн албаны шинэтгэл,Төр засгийн зүгээс олон улсын хэмжээнд хөгжлийн бодлого боловсруулах, хэрэгжүүлэх чадавхи буюу өрсөлдөх чадварыг дээшлүүлэхэд туслалцаа хэрэгтэй байгааг дурьдав.
Уулзалтын төгсгөлд, П.Цагаан “Монгол хүний боловсрол, чадамжийг нэмэгдүүлэх нь Монгол Улсын хөгжлийн гол түлхүүр тул USAID-ийн зүгээс үндэсний боловсон хүчний боловсролын түвшнийг нэмэгдүүлэх, судалгаа, шинжилгээ хийх аргачиллыг заах замаар оюуны хөрөнгө оруулалт хийх хэрэгтэй” байгааг онцлон хэллээ.
Ерөнхийлөгчийн Ахлах зөвлөх П.Цагаан АНУ-ын Олон Улсын Хөгжлийн Агентлагийн ажлын хэсэгтэй уулзав
