Монгол Улсын Ерөнхийлөгч Ц.Элбэгдоржид Япон Улсаас тус улсад суугаа Онц бөгөөд Бүрэн эрхт Элчин сайд Т.Кидокоро өнөөдөр бараалхав. Тэрээр Японд байгалийн гамшиг учирсантай холбогдуулан Монгол Улс тусламж үзүүлж буйд Японы Гадаад хэргийн яамнаас талархлын бичиг ирүүлснийг Монгол Улсын Ерөнхийлөгчид уншин сонсголоо. Тэрхүү бичигт “Японы зүүн хойд хэсэгт газар хүчтэй хөдөлсөнтэй холбогдуулан танай Улсаас яаралтай аврах багийг илгээн, мөнгөн болон эд материалын шуурхай тусламж үзүүлсэн явдалд чин сэтгэлийн талархал илэрхийлье.
Японы Улсын Засгийн газар энэхүү хүнд хэцүү цаг үеийг даван туулахаар гамшигт автагдсан гадаадын болон өөрийн орны иргэдийг хамгаалах, гамшигт сүйрсэн зүйлээ түргэн сэргээн босгохын төлөө тухайн бүс нутгийн иргэд, нийт ард түмэн хүчээ нэгтгэн зүтгэж байна. Бас Фүкүшимагийн атомын нэгдүгээр цахилгаан станцын ослын хохирлын хэмжээг нэмэгдүүлэхгүйн тулд бүх хүчин чармайлтаа дайчлан ажиллаж байгаа. Монгол Улс болон бусад олон улсын хамтын нийгэмлэгт ил тод байдлаар хандаж, зохих мэдээллийг өгч байх болно.
“Зовох цагт нөхрийн чанар танигдана” гэсэн монгол ардын зүйр үг байдаг. Энэ удаа танай улсаас илгээсэн аврах багийн үйл ажиллагаа, дулаан хөнжил гэх мэт тусламжийн эд зүйлс нь зөвхөн түүнийг хүлээж авсан Мияаги мужийн иргэд төдийгүй хүнд хэцүү байдлыг даван туулахаар зүтгэж буй Японы ард түмний хувьд жинхэнэ нөхрөөс нь үзүүлж буй халуун сэтгэлийн өгөөмөр тусламж болсон. Энэ завшааныг ашиглан Монголын ард түмэнд дахин талархлаа илэрхийлж байна. Япон Улсын Засгийн газар” гэжээ
Ерөнхийлөгч хариуд нь “Эрхэм Элчин сайд Япон Улсын Засгийн газраас Монгол Улсын Засгийн газар, монголын ард түмэнд илүүлсэн албан ёсны талархлыг өөрийн биеэр дамжуулсанд их баярлалаа. Японы ард түмэн, Япон Улсад тохиолдсон байгалийн гамшгийн үед монголын ард түмэн японы ард түмэнтэй байнга сэтгэл санааны хувьд хамт байсан гэдгийг дахин хэлье. Олон мянган хүний амь үрэгдсэн, олон мянган хүн алга болсон, эд хөрөнгө сүйдсэнд монголын ард түмэн, төр засгийн зүгээс Японы цог жавхлант эзэн хаан, түүний гэр бүл, Засгийн газар, японы ард түмэнд дахин гүн эмгэнэл илэрхийлж, сэтгэл санааны хувьд хамт байгаагаа хэлэхийг хүсч байна. Япон Улсад тохиолдсон энэ байгалийн гамшгийг даван туулахын төлөө ажиллаж байгаа японы иргэд, ард түмний тэсвэр тэвчээр, өндөр ёс зүй, зохион байгуулалт дэлхий нийтийн бахархлыг зүй ёсоор төрүүлж байна.
Мөн гамшгийг даван туулах үйл ажиллагааг удирдаж байгаа Ерөнхий сайд Н.Кан тэргүүтэй Засгийн газрын чадварлаг ажиллагаа бид бүхний бахархлыг төрүүлж байна. Бид тэнд гарч байгаа ахиц дэвшил бүхнийг өглөө бүхэн харж үргэлж хамт байна. Энэ байгалийн гамшгийг японы ард түмэн олон улсын сайн санаат хүмүүстэй хамтран тэдний тусламж дэмжлэгтэйгээр амжилттай даван туулж чадна, нурсан сүйдсэн бүхнээ сэргээн босгож чадна гэдэгт итгэлтэй байна. Дашрамд японы ард түмний тэр уй гашууг хуваалцахаар тухайн цаг үед эрчимтэй ажиллан тусламж, хандив ирүүлсэн олон иргэд, төр засгийн байгууллагуудад Монголын төрийн өмнөөс талархал илэрхийлж байна. Цаашид гамшигт өртсөн эдийн засгаа японы ард түмэн сэргээн босгоход монголын ард түмний тусламж дэмжлэг байнга байх болно. Японы Засгийн газар, ард иргэдээс гарсан саналыг монголын төр засаг, ард түмэн маш анхааралтай судлан хамтран ажиллахад бэлэн байна” гэлээ.
Элчин сайд Монгол Улсын Ерөнхийлөгч таны санаачилгаар японы ард түмэн, Засгийн газар маш их дэмийг авч үнэхээр баярлаж байгаагаа илэрхийлмээр байна хэмээв.
