Монгол Улсын Ерөнхийлөгчийн санаачлагаар, тус улсын хууль хэрэглэгч болон хууль сахиулагч байгууллагуудын үйл ажиллагааг цаг үеийнх нь шаардлагад нийцүүлэн боловсронгуй болгох зорилтын хүрээнд тухайн байгууллагуудын өмнө тулгамдаж буй асуудлыг хэлэлцэж, шийдвэрлэх арга замыг эрэлхийлэх зорилгоор үндэсний чуулганыг зохион байгуулахаар төлөвлөж байна.
Энэхүү чуулга уулзалт нь энэ жил 4 дүгээр сарын 14-15-ны өдрүүдэд Улаанбаатар хотноо “Шүүх эрх мэдлийн шинэчлэл ба шудрага ёс ” сэдвийн дор шүүх, прокурор, цагдаа, өмгөөлөл, шүүхийн шийдвэр гүйцэтгэх байгууллагын болон иргэний нийгмийн байгууллагын төлөөллийг оролцуулан зохион байгуулахаар төлөвлөн ажиллаж байгаа бөгөөд цаашид жил бүр хууль, хяналтын байгууллагуудын өмнө тулгамдаж буй тодорхой асуудлыг хэлэлцэн, нэгдсэн шийдэлд хүрэх үндсэн зорилготой юм.
Иймд хууль, шүүхийн байгууллагуудын өмнө тулгамдаж буй асуудлуудын шийдлийг эрэлхийлсэн энэхүү форумд шүүх, хуулийн байгууллагын шинэтгэлийг гүнзгийрүүлэхэд өөрийн хувь нэмрийг оруулахыг хүсэгч иргэн та бүхэн идэвхтэй оролцож, өөрийн санаа бодол, дуу хоолойг irgen@president.mn цахим шуудангаар бидэнд ирүүлнэ үү.
Жич: Чуулганд оролцохыг хүссэн иргэдийн бүртгэл 2011 оны 4 дүгээр сарын 1-нээс эхлэх Ерөнхийлөгчийн дэргэдэх Иргэний танхимын 266876 дугаарын утсаар авах бөгөөд эхний 20 иргэнийг оролцуулах болно.
ЕРӨНХИЙЛӨГЧИЙН ТАМГЫН ГАЗАР
