Ерөнхийлөгчийн сорил хөдөлгөөний хомсдолоос аварна
Ерөнхийлөгчийн Тамгын газар, Биеийн тамир, спортын газар хамтран “Хүн амын бие бялдрын хөгжил, чийрэгжилтийн түвшин тогтоох сорилын шалгуурыг боловсронгуй болгох нь” сэдэвт хэлэлцүүлгийг өнөөдөр “Иргэний танхим”-д зохион байгууллаа.
Монгол Улсын Ерөнхийлөгч Ц.Элбэгдорж орчин үеийн эрүүл амьдралын хэв маяг, зан үйлд хүн амыг сургах, аливаа саад бэрхшээлийг даван туулах бие, сэтгэлийн тэсвэр хатуужилтай шинэ үеийг бий болгох зорилгоор энэхүү сорилыг жил бүрийн дөрөвдүгээр сард авч байх талаар 2010 оны гуравдугаар сарын 23-ны зарлигтаа тусгасан юм. Түүнээс гадна биеийн тамир, спортыг нийтийн үйлс болгох зорилгоор дунд, их дээд сургуульд сурагч, оюутнуудыг спортоор хичээллэх таатай орчин нөхцөлөөр хангах, спортын хамтлаг, клубын тогтолцоог нэвтрүүлж ажиллахыг төрийн болон төрийн бус байгууллага, тамирчид, дасгалжуулагчид, бизнесийн бүх байгууллага, нийт ард иргэдэд уриалсан билээ.
Тиймээс Биеийн тамир, спортын газар зарлигийг амьдралд хэрэгжүүлэхээр өнгөрсөн хоёр жилд багагүй ажил зохион байгуулжээ. Энэ нь зарлигийг орон даяар 2 жил сурталчлан, 184 арга зүйч бэлтгэснээс гадна 1,3 сая хүнийг сорилд хамруулсан тоо баримтаас харагдаж байна. Харин монголчуудын 10 хүн тутмын 1 нь хөдөлгөөний хомсдолтой гэсэн судалгаа гарчээ.
Хэлэлцүүлэгт Биеийн тамир, спортын газрын хэлтсийн дарга Ж.Тунгалаг “Хүн амын бие бялдрын чийрэгжилтийн түвшин тогтоох сорилын өнөөгийн байдал”, Үндэсний биеийн тамирын дээд сургуулийн тэнхимийн эрхлэгч Р.Ганбаатар “Хүн амын бие бялдрын хөгжилтийн түвшингийн үнэлгээний ач холбогдол”, Монголын оюутны спортын холбооны ерөнхий нарийн бичгийн дарга Д.Жаргалсайхан “Сорилын шалгуур, түүнийг боловсронгуй болгох асуудал, арга замууд”, Дулааны 3 дугаар цахилгаан станцын биеийн тамирын арга зүйч Г.Ойдов “Ерөнхийлөгчийн зарлигийн хэрэгжилт анхан шатны байгууллагад” гэсэн илтгэлүүд тавьж, оролцогчид саналаа хэлэв.
Илтгэгчид болон оролцогчид хэлэлцүүлэг зохион байгуулсанд талархан олон санал гаргалаа. Тухайлбал хүмүүст нийтийн биеийн тамир, спортыг ялгаж ойлгуулах, хөдөлгөөн бол амьдралын хэмнэл, өдөр тутмын талхи шиг хэрэгтэй зүйл гэдгийг мэдрүүлэх, сорилын дасгалууд нас насандаа хэр нийцсэнийг судлах, зохисгүйг нь өөрчлөх, олон улсын стандартад дүйцүүлэх, сорилыг тогтмол авдаг, бас тэмдэглэгээний дэвтэртэй байх, биеийн тамирын хичээлийг нэгдүгээр ангиас нь мэргэжлийн багшаар заалгах, сурах бичигтэй болгох, долоо хоногт ордог цагийг нэмэх, биеийн тамир, эрүүл мэндийн багшийг нэг мэргэжлээр бэлтгэх, сургууль бүрд заал барьж өгөх, секц, дугуйлан хичээллүүлсэн багшийн цагийг үнэлэх, заах арга зүйг өөрчлөх, үзүүлэнг олноор хэвлэх, спортын нэр төрлийг олшруулах, байгууллагууд дахь биеийн тамирын зааварлагчийг орон тооны болгох, төрийн албан хаагч, оюутан элсүүлэх шалгалтад сорилыг оруулах, Эрүүл мэндийн яам, Боловсрол, соёл, шинжлэх ухааны яам, Биеийн тамир спортын газрын ажлын уялдааг сайжруулах хэрэгтэйг онцлон өгүүлж байв. Тэд бас сорилын нэрийг богиносгон ерөнхийлөгчийн эсвэл чийрэгжилтийн сорил гэж нэрлэмээр байна гэсэн юм.
Ерөнхийлөгчийн сорил хөдөлгөөний хомсдолоос аварна
