Монгол Улсын Ерөнхийлөгч Ц.Элбэгдорж Европын сэргээн босголт, хөгжлийн банкны ерөнхийлөгч Томас Мирроу тэргүүтэй төлөөлөгчдийг өнөөдөр хүлээн авч уулзав.
Европын сэргээн босголт, хөгжлийн банкны зүгээс 400 гаруй сая ам долларын шууд хөрөнгө оруулалт болон зээлийн санхүүжилтийг Монголын хувийн хэвшлийн компаниудад олгоод байна. Мөн бусад эх үүсвэрээс 800 гаруй сая ам долларын санхүүжилт хийлээ. Уул уурхай, сэргээгдэх эрчим хүч, жижиг, дунд үйлдвэр, банк санхүүгийн салбарт төслүүдээ түлхүү хэрэгжүүлж байгаа. Тус банк хувийн хэвшлийн өсөлт, хөгжлийг тэтгэхэд чиглэсэн санхүүжилт олгохын зэрэгцээ уул уурхайн салбарын тогтвортой хөгжлийг хангах, дэд бүтцийг дэмжих, байгальд ээлтэй технологи нэвтрүүлэхэд зориулан техникийн тусламж үзүүлэхэд анхаарч байна гэж Томас Мирроу ярилаа.
Жижиг, дунд үйлдвэрлэл, дэд бүтэц тухайлбал, тээвэр, зам, төмөр зам, цахилгаан станц, сэргээгдэх эрчим хүчний салбарт хамтран ажиллах боломж байгааг Ерөнхийлөгч онцлов.
