Нийслэлийн агаарын бохирдлыг бууруулах Үндэсний хороо өнөөдөр хуралдаж, энэ онд авах арга хэмжээний санхүүжилтийг хэрхэн шийдвэрлэх талаар Сангийн яамны Төрийн нарийн бичгийн дарга Д.Баттөрийн сонсголыг сонсож, хорооны жилийн нэгдсэн төлөвлөгөөний тодотголтой танилцлаа.
Үндэсний хороо 2011 онд нийслэлийн агаарын бохирдлыг бууруулах ажилд шаардагдах хөрөнгийн тооцоог урьдчилсан байдлаар гаргасан байна. Үүнд үртсэн болон шахмал түлш үйлдвэрлэгчдэд олгох татаас 3.1 тэрбум, цахилгаан халаагуурт 1,6 тэрбум, цахилгаан халаагуур хэрэглэх болон хуулийн нөхцөл шаардлагыг хангасан айл өрхөд өгөх хөнгөлөлтөд 4.5 тэрбум, түлш худалдаалах цэг байгуулах, мэдээлэл сурталчилгаа, тээврийн хэрэгслийн бохирдлыг бууруулахад 7.6 тэрбум, гэрийн дулаалгад 8.4 тэрбум, гэрийн зууханд 8.8 тэрбум, нийт 34 тэрбум төгрөг хэрэгтэй гэсэн байна.
Харин Сангийн яам Нийслэлийн агаарын бохирдлыг бууруулах тухай хууль болон түүнийг хэрэгжүүлэх УИХ-ын тогтоолыг ажил хэрэг болгоход шаардагдах хөрөнгийг судалж байгаа бөгөөд тэдгээрийг нарийвчлан яам, агентлагийн багцад суулгах асуудлыг төсвийн тодотголоор шийдэх бодолтой ажээ.
Нийслэлийн Засаг даргаас Сангийн яаманд ирүүлсэн тооцоо Үндэсний хорооныхоос их зөрөөтэй байна. Иймд агаарын бохирдлыг бууруулах чиглэлээр ажиллаж байгаа ажлын хэсгүүд, Нийслэлийн Засаг даргын Тамгын газар мэргэжлийн байгууллагуудтай хамтран тооцоо, судалгааг нэг мөр болгох шаардлагатай байна. Энэ нь тендер зарлах, төсөл хэрэгжэх, хөрөнгийн эх үүсвэрийг төлөвлөх, санхүүжүүлэхэд ихээхэн ач холбогдолтой. 800 гаруй тэрбум төгрөгийн хөрөнгө оруулалт шаардлагатай эрчим хүчний тавдугаар эх үүсвэрийн талаар тусгаагүй байна. Мөн эхний ээлжийн 6000 айл өрхөд цахилгаан дамжуулах, түгээх сүлжээг өргөтгөх ажилд 23.2 тэрбум төгрөгийн хөрөнгө оруулалт хэрэгтэй. Үүнийг энэ тооцоонд оруулах нь зүйтэй. Нийслэлийн агаарын бохирдлыг бууруулах арга хэмжээг хэрэгжүүлж эхлээд байгаа. Гэр хорооллыг цахилгаан эрчим хүчээр хангах, дэд станцуудыг шинэчлэх ажилд 2011 онд 21.6 тэрбум төгрөг төсөвлөсөн. Одоогоор 6 тэрбум төгрөгийг санхүүжүүлээд байна. Цэвэр агаарын санд 2011 онд нийт 30 тэрбум төгрөг төлөвлөгдсөн бөгөөд түүнийг УИХ-ын тогтоолын заалтыг хэрэгжүүлэх арга хэмжээнд зарцуулна. Агаарын бохирдлыг бууруулах ажилд шаардагдах хөрөнгийн эх үүсвэрийг шийдвэрлэн, нийслэл хотоо хорт утаанаас ангижруулах их үйлсийн төлөө хамтран ажиллах болно гэж Сангийн яамны Төрийн нарийн бичгийн дарга хэллээ.
Үндэсний хороо удахгүй Байгаль орчин, аялал жуулчлалын сайдын сонсголыг түлшний хуваарьлалтын, Мянганы сорилын сангийн гүйцэтгэх захирлынхыг гэрийн зуух, дулаалгатай холбоотой асуудлаар сонсоно. Үндэсний хорооны гишүүд өөр өөрийн чиглэлээр хуулийг хэрэгжүүлэх, төсөв хөрөнгийг шийдвэрлэхэд идэвхтэй ажиллаарай гэж Ерөнхийлөгчийн Тамгын газрын дарга, Нийслэлийн агаарын бохирдлыг бууруулах Үндэсний хорооны дарга Д.Баттулга хэлэв.
