Үндэсний спортын улсын зөвлөгөөнд оролцогчдод
Монголчуудын түүх соёлоороо бахархах, үндэстний омогшлийг төрүүлэх, үндэсний спорт, тоглоом наадгайн өв уламжлалаа хойч үедээ өвлүүлэн хадгалуулах, ёс заншлаа дээдлэн хөгжүүлэх үйлсэд өөрсдийн оюун ухаан, хүч чадлаа зориулж буй төрийн болон төрийн бус байгууллагын төлөөлөгчид, үндэсний спортын зүтгэлтнүүд, тамирчид Та бүхэнд Төрийн тэргүүний зүгээс чин сэтгэлийн халуун баяр хүргэж, зөвлөгөөний ажиллагаанд амжилт хүсье.
Үндэсний спорт бол монголчуудын соёлын үнэт өв, өвөг дээдсээс маань бидэнд өвлүүлсэн гайхамшигт бүтээл билээ. Төр засгийн зүгээс үндэсний спортыг хөгжүүлэхэд эрх зүй, бодлогын түвшинд онцгой анхаарал тавьж Монгол Улсын Их Хурал “Биеийн тамир, спортын тухай” хууль, “Биеийн тамир, спортын талаар төрөөс баримтлах бодлого”, Засгийн Газраас “Үндэсний спортыг 2012 он хүртэл хөгжүүлэх хөтөлбөр”, Монгол Улсын Ерөнхийлөгч “Үндэсний сурын харвааг хөгжүүлэх тухай” болон “Нийтийн биеийн тамир, спортыг хөгжүүлэх тухай” зэрэг зарлиг, тогтоол шийдвэрүүдийг гаргасан. Гэвч эдгээр баримт бичиг, шийдвэрүүдийн хэрэгжилт бидний хүссэн хэмжээнд хараахан хүрээгүй байгааг Та бид мэднэ.
Өдгөө монгол хүний бие бялдрыг хөгжүүлэхэд биеийн тамир, спорт, түүний дотор үндэсний спортын үр нөлөөг ашиглах явдал чухлаар тавигдаж байна. Олимп, тив, дэлхийн тэмцээнээс медаль хүртэх, олон сайн тамирчин төрүүлэх нь нэг хэрэг, харин эзэн Чингисийн үеийнх шиг олонхи иргэдийг эрүүл чийрэг бие бялдартай, өв тэгш хүмүүжилтэй болгон бэлтгэх нь хамгийн чухал юм.
Үүнд юуны өмнө биеийн тамир, спортын хичээл сургалтыг боловсронгуй болгох, секц дугуйлангийн тоог олшруулах, хүүхэд залуучуудыг өргөнөөр хамруулах ажлыг зохион байгуулж тэднийг багаас нь үндэсний спортод дур сонирхолтой болгон төлөвшүүлэх, хүүхдийг спортын нэгээс хоёр төрлөөр дагнан хичээллүүлдэг хэрэгцээг бий болгох нь тус салбарын ажилтан, багш дасгалжуулагч нарын эрхэм зорилго болох ёстой.
Биеийн тамирын дасгал, хөдөлгөөнөөр хичээллэх нь хүмүүнийг бие бялдар, оюун санааны хувьд хөгжүүлэх хамгийн үр дүнтэй арга мөн.
Монгол Улсын Ерөнхийлөгчийн ивээл дор анх удаа болж буй улсын зөвлөгөөнд оролцогч Та бүхний үндэсний спортыг хөгжүүлэх оновчтой санал санаачлага, өв соёлыг хадгалах, уламжлах, үндэсний спортын байгууллагын үйл ажиллагааг хөгжүүлэхэд миний бие цаашид ч бүх талаар дэмжлэг үзүүлж оролцох болно.
Монгол үндэсний уламжлалт спортын төрлүүд улам түгэн хөгжиж, монголчуудын хүч чадлын дархлаа болж, үеийн үед үндэстний бахархал байх болтугай.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
2011 оны 4 дүгээр сарын 12
Улаанбаатар хот
