Ерөнхийлөгчийн Тамгын газрын дарга, Нийслэлийн агаарын бохирдлыг бууруулах үндэсний хорооны дарга Д.Баттулга өнөөдөр сэтгүүлчдэд мэдээлэл хийлээ. Тэрээр хэлэхдээ “Нийслэлийн агаарын бохирдлыг бууруулах үндэсний хорооны ээлжит хурал өнөөдөр болж, нэлээд хэдэн асуудлыг хэлэлцэн тодорхой шийдвэр гаргалаа. Бид 2011-2012 оны өвлийн агаарын бохирдлыг бууруулахаар төлөвлөн ажиллаж байна.
Агаарын чанарыг сайжруулах бүс дэх буюу гэр хороолол дахь хязгаарлалтын бүсийг Нийслэлийн Засаг дарга Г.Мөнхбаяр, БОАЖ-ын сайд Л.Гансүх нар гарын үсэг зурж баталлаа. Энэ агаарын чанарын бүсэд түүхий нүүрсийг хязгаарлах үндсэн бүсийг байгуулж, тэнд 11 мянган айлыг хамруулах болов. Эдгээр айл өрх 2011-2012 оны өвөл түүхий нүүрс түлэхгүй. Хуулиараа ингэж хориглосон юм. Тэдний түлэх үртсэн болоод коксжсон нүүрсийг 5 дугаар сард бэлтгэж эхлэх ёстой. 40 мянга орчим тонн коксжсон нүүрс, 11 мянган тонн үртсэн түлш шаардлагатай. Энэ түлшийг үйлдвэрлэгчдэд тодорхой хэмжээний урамшуулал, татаас олгох, хөдөлмөрчдийн гар дээр очих түлшний үнэ түүхий нүүрснийхээс ихгүй байхаар журам баталж, санхүүжилтийн асуудлыг нь шийдлээ. Коксжсон нүүрсийг 150 мянган төгрөгөөр зах зээлд нийлүүлдэг. Үүний 60000 төгрөгийг “Цэвэр агаар” сангаас чөлөөлж, 90000-ыг нь хэрэглэгч айлаас авах, үйлдвэрлэгчдэд нь урьдчилгаа өгөх асуудлыг хэлэлцэн тогтлоо. Ингэснээр 5-9 дүгээр сард үртсэн болон коксжсон нүүрсэн түлш бэлтгэх ажил эхэлж байна гэж ойлгож болно. Мянганы сорилын сангийн санхүүжилтээр утаа бага гаргадаг, гүн шаталттай 60 мянган зуухыг айл өрхөд тараах ажлыг тавдугаар сарын сүүлч, зургадугаар сарын эхээр эхлүүлнэ. Чингэлтэйгээс эхэлнэ, дараа нь Сүхбаатар, Сонгинохайрхан, Баянзүрх, Хан-Уул дүүргийн өрхүүдэд энэ зуухыг олгох юм. Зуухыг аравдугаар сарын 1 гэхэд тарааж дууссан байна.
Дашрамд хэлэхэд манай аж ахуйн нэгжүүд агаарын бохирдлыг бууруулахад хувь нэмэр оруулна гэдэгт итгэж байна. Тавдугаар сарын 5-нд Их тэнгэрт Монгол Улсын Ерөнхийлөгч 150 орчим аж ахуйн нэгжийн удирдлагатай уулзаж, энэ талаар санал солилцоно. Үүний дараа агаарын бохирдлыг бууруулах тодорхой хөдөлгөөн өрнөнө гэж бодож байна” хэмээн мэдэгдлээ.
