Монгол Улсын Ерөнхийлөгч Ц.Элбэгдоржид Германы Бундестаг дахь Ногоон намын бүлгийн Эрчим хүчний бодлогын асуудлаархи илтгэгч, Бундестагийн гишүүн ноён Ханс-Ёозеф Фелл өнөөдөр бараалхлаа.
Байгаль хамгаалах болон уур амьсгалын өөрчлөлтийн эсрэг хийх тэмцэлд идэвхитэй байр суурь баримталж байгаад Ерөнхийлөгч Ц.Элбэгдоржид ноён Х.Й.Фелл баяр хүргээд сэргээгдэх эрчим хүчний тухай Германы болон олон улсын туршлагын талаар товч мэдээллээ. Тухайлбал, Герман Улс 2000 онд Сэргээгдэх эрчим хүчний тухай хууль баталсан бөгөөд германы эрчим хүчний хангамжинд сэргээгдэх эрчим хүч 6 % байсан бол өдгөө 17 %-д хүрч, энэ салбар тус улсад автомашин үйлдвэрлэлийн дараа хоёрт орох том салбар болж өргөжсөн байна.
Эрчим хүчний дэлхийн хэрэгцээг 2030 он гэхэд сэргээгдэх эрчим хүчээр бүрэн хангах бололцоотой гэж АНУ-ын Станфордын их сургуулиас хийсэн судалгаанд дүгнэсэн тухай ноён Х.Й.Фелл мөн танилцууллаа. Сэргээгдэх эрчим хүчийг ашигласнаар уур амьсгалын өөрчлөлт, дэлхийн дулаарлыг зогсоох боломж бий гэж тэрбээр онцлов.
Ерөнхийлөгч Ц.Элбэгдорж хэлэхдээ эрчим хүчний хэмнэлтэд анхаарч, эрчим хүчийг үр ашигтай ашиглах, сэргээгдэх эрчим хүчний хэрэглээг дэмжихэд Монгол Улс анхаарч байна. Жилийн 300 гаруй хоногт нартай байдаг Монголын говьд нарны эрчим хүчийг ашиглах ихээхэн бололцоо бий гээд Монгол Улсын Их Хуралд Ногоон бүлэг байгуулагдаж, сэргээгдэх эрчим хүчний талаар идэвхтэй ярьж байгааг онцлон тэмдэглэлээ. Байгаль орчинд хоргүй сэргээгдэх эрчим хүчний чиглэлээр Монгол Улс, ХБНГУ идэвхитэй хамтран ажиллах талаар тэд санал нэгдсэн юм. Уулзалтад ХБНГУ-аас Монгол Улсад суугаа Онц бөгөөд Бүрэн эрхт Элчин сайд Пиус Фишер байлцав.
