Монгол Улсын Ерөнхийлөгч Ц.Элбэгдорж, Оросын Холбооны Улсын Ерөнхийлөгч Д.А.Медведев нар энэ 5 дугаар сарын 7-ны өдөр утсаар ярьж, Монгол Улс, ОХУ-ын харилцааны зарим асуудлаар санал солилцов. Ерөнхийлөгч Ц.Элбэгдорж ОХУ-ын Ерөнхийлөгчид удахгүй болох Aугаа эх орны дайны ялалтын өдрийн баярын мэнд дэвшүүлж, Ерөнхийлөгчийн тангараг өргөж ажилдаа орсоны гурван жилийн ой энэ өдөр тохиож буйтай холбогдуулан Д.А.Медведевт мөн баяр хүргэв. Аугаа эх орны дайны ялалтад Монголын ард түмний оруулсан хувь нэмэр, үзүүлсэн тусламжийг оросын ард түмэн үргэлж дурсаж байдгийг Ерөнхийлөгч Д.А.Медведев тэмдэглэж, энэ онд Монгол Улс, ОХУ-ын хооронд дипломат харилцаа тогтоосны 90 жилийн түүхэн ой тохиож буйг цохон дурьдав.
Ерөнхийлөгч нар Монгол, Оросын эдийн засаг, худалдааны харилцааг идэвхижүүлэх арга замын талаар санал солилцов. Одоогоос 20 жилийн өмнө Монгол Улсын нийт экспортын 90 гаруй хувь Оросын зах зээлд гарч байсан бол өнгөрсөн жилийн статистикийн дүнгээр манай экспортын дөнгөж 3% ОХУ-д ноогдож буй ажээ. Эдийн засаг, худалдааны харилцаа ийнхүү зогсонги байдалд орсоныг өөрчилж, Монголын талын худалдааны алдалдлыг бууруулах чиглэлээр хоёр талаас дорвитой арга хэмжээ авах шаардлагатай байгаа талаар Ерөнхийлөгч нар санал нэгдэж, энэ чиглэлээр Засгийн газрууддаа чиглэл өгөхөөр тохиров. Мөн Улаанбаатар төмөр замын хамтарсан нийгэмлэг байгуулах тухай 1949 оны гэрээг өнөөгийн нөхцөл, шаардлагад зохицуулан өөрчлөх, ОХУ-ын нутгаар дамжин өнгөрөх төмөр замын тээврийн тарифийн хэлэлцээрийг байгуулах асуудлаар ярилцаж, энэ асуудлаарх яриа хэлэлцээг эрчимжүүлж, ойрын үед тохиролцох үүднээс Монгол Улс, ОХУ-ын Засгийн газар хоорондын хамтарсан комиссын дарга нарын уулзалтыг даруй зохион байгуулахаар болов.
