Монгол Улсын Ерөнхийлөгч Ц.Элбэгдорж зарлиг гарган, бөхийн самбо, жудо барилдааны төрлөөр улсын аварга болон олимп, тив, дэлхийн аварга шалгаруулах тэмцээнд удаа дараа амжилттай оролцож, жудо бөхийн дэлхийн цомын болон дэлхийн аварга шалгаруулах тэмцээнээс тус тус монголын анхны алтан медаль хүртэн эх орныхоо нэрийг дэлхийн тавцанд өргөн мандуулж, спортын онцгой амжилт гаргасныг нь үнэлж Монгол Улсын насанд хүрэгчдийн жудо бөхийн улсын шигшээ багийн тамирчин Хашбаатарын Цагаанбаатарт Монгол Улсын Хөдөлмөрийн баатар цол хүртээж Сүхбаатарын одон, “Алтан соёмбо” тэмдгээр шагналаа.
Ерөнхийлөгч Ц.Элбэгдорж “ Улс орон, тив дэлхийн хэмжээний олон арван спортын тэмцээнд таны үзүүлсэн амжилт бол монгол хүн бүрийн баяр бахдалыг төрүүлж, урам зоригийг бадрааж залуу үеийнхэнд үлгэр дууриал болж байна. Афины Олимпийн хүрэл медаль, Ази тив болоод Дэлхийн аваргын алтан медалиуд , самбо, жудо бөхөөр зөвхөн улсдаа гэхэд 13 удаа түрүүлсэн энэ амжилт бол Таны хөлс хүч, эр зориг, тэсвэр тэвчээр болон эх оронч үзлээр тань буй болсон Монгол түмний минь бахархал юм” гээд “2004 онд Афины дэвжээнээс хүрэл медальтай ирээд Монгол Улсын гавъяат тамирчин болж байсан. Гавъяат цолондоо эзэн болж байгаагаа Та харуулж байна. Одоо харин Хөдөлмөрийн баатар гэсэн энэ эрхэм цолондоо эзэн болж, амжилтаа бататгаарай” хэмээн захилаа.
Монгол Улсын Хөдөлмөрийн баатар болсон Х.Цагаанбаатар Монгол Улсын Ерөнхийлөгчид талархлаа илэрхийлээд, амжилт бүхэн минь хамт олон, багш нарын маань хөлс хүч шингэсэн хөдөлмөр юм, цаашдаа энэ эрхэм хүндтэй цолны нэр хүндийг өндөрт өргөж, төрийнхөө далбааг ямагт мандуулж явах болно гэлээ.
Х.Цагаанбаатар, Нидерландын Роттердам хотод болсон Жүдо бөхийн Дэлхийн аварга шалгаруулах тэмцээнээс алтан медаль хүртээд өнөөдөр эх орондоо ирэнгүүтээ, ийнхүү Монгол Улсын Ерөнхийлөгчөөс цол тэмдэгээ гардаж авлаа.
