Монгол Улсын Ерөнхийлөгч Ц.Элбэгдоржид Европын Парламент дахь Төв Ази, Монголын бүлгийн дарга Паоло Бартолоззи тэргүүтэй төлөөлөгчид өнөөдөр бараалхлаа. Ерөнхийлөгч Ц.Элбэгдорж хэлэхдээ “Монгол Улс ардчилал, зах зээлийн эдийн засагт шилжиж, шударга ёс, хүний эрхийг баталгаажуулахад бүс нутагтаа үлгэрлэж байна. Дэлхийн энх тайван, тогтвортой байдлын төлөө ардчиллын үзэл санаа, нийтлэг үнэт зүйлсээрээ холбогдсон Монгол Улс, Европын Холбоо өнгөрсөн хорин жилд эрчимтэй харилцаа, хамтын ажиллагаа өрнүүлж ирсэн билээ.
Монголын ардчиллыг эхнээс нь дэмжиж байсанд Европын Холбоонд талархаж байна. Түншлэл, хамтын ажиллагааны хэлэлцээр байгуулах нь хоёр талын хамтын ажиллагааг шинэ түвшинд гаргаж, шинэ өргөн боломжийг нээх төдийгүй биднийг харилцааг бүх талаар хөгжүүлэх эрх зүйн орчинг бүрдүүлэх болно. Энэ ондоо хэлэлцээрийг гарын үсэг зурж батална гэдэгт итгэж байна” гэв. Ерөнхийлөгч мөн Европын Холбоо ойрын ирээдүйд Улаанбаатарт төлөөлөгчийн газраа нээх асуудлыг авч үзэхийг санал болгов.
Европын Парламент дахь Төв Ази, Монголын бүлгийн дарга Паоло Бартолоззи цаг гарган хүлээн авсанд Ерөнхийлөгчид талархаад Европын Холбоо, Монгол Улсын хооронд Түншлэл, хамтын ажиллагааны хэлэлцээр байгуулна гэдэгт итгэлтэй байгаагаа дурьдаж, өнгөрсөн жил Монгол Улсын Ерөнхийлөгч Европын Холбоонд амжилттай айлчилсныг дурсан, цаашид туслалцаа, хамтын ажиллагаагаа үргэлжлүүлэхээ илэрхийллээ. Зарим төлөөлөгч Монгол Улсад хийсэн өмч хувьчлалын тухай, Европын орнуудтай оюутан солилцох болон холбооны жуулчдыг хүлээн авах боломжийн талаар сонирхон асуулт тавьж байлаа.
Европын парламентын төлөөлөгчид Монгол Улсын Ерөнхийлөгчид бараалхахад УИХ-ын дэд дарга Г.Батхүү, Ерөнхийлөгчийн зөвлөх Л.Пүрэвсүрэн, албаны бусад хүн байлцав.
