Монгол Улсын Ерөнхийлөгчийн Тамгын газар “Архигүй Монголын төлөө хамтдаа” уриалгыг хэрэгжүүлэх ажлын хүрээнд архидан согтуурахтай тэмцэх эрх зүйн орчныг шинэчлэх санал боловсруулах зорилгоор “Иргэний танхим”-д уулзалт-хэлэлцүүлэг өнөөдөр зохион байгуулав. Уулзалт-хэлэлцүүлгэд Эрүүл мэндийн яам, Нийгмийн хамгаалал, хөдөлмөрийн яам, Боловсрол, соёл, шинжлэх ухааны яам, Мэргэжлийн хяналтын ерөнхий газрын удирдах ажилтнууд, Төрийн бус байгууллагуудын болон Архигүй Монголын төлөө үндэсний сүлжээний төлөөлөл оролцлоо.
ХЗДХЯ-ны хууль зүйн бодлогын газрын орлогч дарга С.Мандахбат “Согтууруулах ундаа үйлдвэрлэх, импортлох, худалдах, хэрэглэх, түүгээр үйлчлэх тухай” хуулийн төсөл буюу одоогийн “Архидан согтуурахтай тэмцэх тухай” хуулийн шинэчилсэн найруулга”, Сэтгэцийн эрүүл мэндийн үндэсний төвийн сэтгэц-аддиктологийн эмч С.Мөнхтуяа “Архинд донтогсдод үзүүлэх эрүүл мэндийн тусламж, нийгмийн үйлчилгээний хүртээмжийг сайжруулах эрх зүйн өөрчлөлт”, Монгол Улсад гэмт хэргээс урьдчилан сэргийлэх ажлыг зохицуулах зөвлөлийн нарийн бичгийн дарга, Архидан согтуурахаас сэргийлэх, хяналт тавих үндэсний хөтөлбөрийн хэрэгжилтийг зохицуулах хорооны дэд дарга Ж.Нямдаваа “Салбар хоорондын уялдааг хангасан үндэсний зохицуулалтын механизмыг бүрдүүлэх хэрэгцээ, шаардлага ба санхүүжилтийн эх үүсвэр”, МХЕГ-ын улсын ахлах байцаагч Ж.Энхтуяа “Архи ба спиртийн үйлдвэрлэлд тавих хяналтад гарч байгаа хүндрэл, шийдвэрлэх арга замууд”, Шударга өрсөлдөөн, хэрэглэгчийн төлөө газрын Хэрэглэгчийн эрхийн төлөө газрын дарга Ж.Эрдэнэцогт “Архидан согтуурах ундааг ил ба далд хэлбэрээр сурталчлах явдалтай тэмцэх эрх зүйн орчныг сайжруулах тухай”, “Амьдралын алтан боломж” төрийн бус байгууллагын тэргүүн Ж.Цогтсугар “Архидан согтуурлыг бууруулах чиглэлээр ажиллаж буй ТББ-уудыг санхүүжүүлэн ажиллах эрх зүйн орчныг боловсронгуй болгох нь”, Дэлхийн эрүүл мэндийн байгууллагын архины хор хөнөөлийг бууруулах асуудал хариуцсан мэргэжилтэн Нина Рен Мендоза “ДЭМБ-ын бүсээс барьж буй бодлого, хуулийг боловсронгуй болгох зөвлөмж, бусад орны туршлага” гэсэн илтгэлийг тус тус тавив.
Оролцогч олон хүн үг хэлж, саналаа илэрхийлэв. Тэд хуулийн шинэчилсэн найруулгад өмнө нь авсан саналуудыг тусгаагүй, Үндэсний худалдаа, аж үйлдвэрийн танхим, зарим мөнгөтэй хүмүүсийн захиалгаар хийсэн мэт сонсдож байна гэж шүүмжлэлтэй хандлаа. Өөрөөр хэлбэл архи үйлдвэрлэх, импортлох, худалдахад чиглэсэн, согтуурах ундаагаар үйлчлүүлэгчид, архи хэрэглэгчид, тэдэнд үзүүлэх эрүүл мэндийн тусламж, нийгмийн үйлчилгээ, энэ чиглэлээр ажилладаг ТББ-уудын санхүүжилт, тэдгээрийн үүрэг зэрэг олон чухал асуудлыг орхигдуулсан байна гэв. Ингээд тусгах шаардлагатай саналуудаа чигэлэл чиглэлээр нь багцлан нэгтгээд ажлын хэсэгт өгөхөөр боллоо.
