Монгол Улсын Ерөнхийлөгч Ц.Элбэгдоржид НАТО-гийн Аюулгүй байдлын бодлого, Түншлэлийн харилцаа эрхэлсэн Ерөнхий нарийн бичгийн даргын орлогч ноён Жеймс Аппатурай тэргүүтэй төлөөлөгчид өнөөдөр бараалхав. Ерөнхийлөгч НАТО-гийн өндөр албаны хүн Монголд зочилж буйд таатай байгаагаа илэрхийлээд манай улс тус байгууллагатай энх тайван, тогтвортой байдал, ардчилал, нийтлэг үнэт зүйлсийн төлөө нээлттэй, бие даасан, олон тулгуурт гадаад бодлогынхоо хүрээнд нягт харилцаа хөгжүүлэх хүсэлтэй байгааг хэлэв. Мөн Дэлхийн бүх оронтой түншлэх НАТО-гийн хөтөлбөрийн хүрээнд Түншлэл, хамтын ажиллагааны бие даасан хөтөлбөр боловсруулан ажиллаж, НАТО-гийн “харилцагч орон”-ы статустай болохыг сонирхож байгаагаа цохон дурьдаад хоёр талын харилцаа, хамтын ажиллагааны асуудлаар санал солилцлоо.
Ноён Жеймс Аппатурай НАТО-гийн гишүүн орнуудын Гадаад харилцааны сайд нарын түвшинд тохиролцсон Дэлхийн бүх оронтой түншлэх НАТО-гийн хөтөлбөрийг хэрэгжүүлэхээр хамгийн түрүүнд Монголыг зорьж ирснээ дурдаад Монгол Улстай харилцаа, хамтын ажиллагаа хөгжүүлэхээ мэдэгдэв. Тэрээр Монгол Улс Афганистанд цэргийн сургагч илгээн НҮБ-ын мандаттай НАТО-гийн үйл ажиллагаанд хувь нэмрээ оруулж байгаа орон гэдгийг онцлон тэмдэглэв.
