Нийслэлийн агаарын бохирдлыг бууруулах Үндэсний хорооны хурал өнөөдөр болж, түүхий нүүрсийг хязгаарлах бүсэд авах арга хэмжээний асуудлуудыг хэлэлцэн тодорхой шийдвэр гаргав. Энэ бүсийн албан байгууллага, аж ахуй нэгж, иргэдийн дагаж мөрдөх журмыг баталж, сурталчлах, хязгаарлалтын бүсийн өрхийн тоог нэмэгдүүлэхгүй байх, түлш жижиглэн борлуулах цэг байгуулах, хэсгийн ахлагч, дүүрэг бүрт ажиллах гэрээт ажилтан, түлш борлуулах цэгийн ажилтнуудтай гэрээ байгуулахаар тогтлоо. Мөн нийслэлийн нийтийн тээврийн үйлчилгээний их багтаамжийн автобусанд дизель болон шингэрүүлсэн нефтийн хийн хосолмол хэрэглээг нэвтрүүлэх, мөн төрийн үйлчилгээний байгууллагын бага оврын автобус, суудлын авто машин, бусад тусгай зориулалтын тээврийн хэрэгслүүдэд хийн түлшээр ажиллах нэмэлт тоног төхөөрөмж, шатахууны зарцуулалтыг багасгах болон утааны найрлага дахь хорт бодисын агууламжийг бууруулах шинэ техник, технологийг дэмжин нэвтрүүлэх ажлыг зохион байгуулж, шаардлагатай хөрөнгийг “Цэвэр агаарын сан”-гаас санхүүжүүлэхээр шийдвэрлэв. Эрчим хүчний газрын дарга Ц.Баярбаатар 6000 мянган айлыг цахилгаан халаагуураар халаахад 34 тэрбум төгрөг шаардлагатай гэж тооцсоныг Үндэсний хорооны гишүүдийнх дийлэнх олонх нь техник эдийн засгийн үндэслэл муутай, үр ашиггүй болжээ гэж үзэн дахин нягтлан боловсруулахыг даалгалаа
