Наян таван жилийн түүхтэй Монголын эмэгтэйчүүдийн байгууллагын нэгдсэн хоёрдугаар дугаар чуулган өнөөдөр Улаанбаатар хотноо эхэллээ. Тус чуулганаар байгаль орчны аюулгүй байдал болоод хүнсний аюулгүй байдалд эмэгтэйчүүдийн иргэний нийгмийн байгууллагаас хийсэн хяналт-үнэлгээний дүнгийн тухай хэлэлцэж байгаа юм байна.
Чуулганы хүрээнд байгаль орчинд онц аюултай, анхаарал татсан 76 асуудлын жагсаалтыг гарган хэлэлцүүлж буй бөгөөд төрийн захиргааны бүх шатны байгууллагууд болон нийт иргэд, иргэний нийгмийн байгууллагад зориулж байгаль орчны аюулгүй байдал, хүнсний аюулгүй байдлын чиглэлээр 23 зүйл бүхий зөвлөмж гаргажээ.
Тус чуулганд Монгол Улсын Ерөнхийлөгчийн Үндэсний аюулгүй байдлын бодлогын зөвлөх М.Батчимэг оролцож Ерөнхийлөгчийн мэндчилгээг дэвшүүлж илгээлтийг хүргэсэн юм.
Монгол Улсын Ерөнхийлөгч илгээлтдээ: “Монгол орны үе үеийн хөгжил цэцэглэлтийг эмэгтэйчүүдийн оролцоогүйгээр төсөөлөх аргагүй билээ. Ялангуяа өнөөгийн эмэгтэйчүүд нийгмийн амьдралд тэгш оролцож, боловсрол, эрүүл мэндийн салбарт тэргүүлэх үүрэгтэй болоход нь Монголын эмэгтэйчүүдийн байгууллагуудын гүйцэтгэсэн түүхэн үүрэг асар их гэдгийг онцлон тэмдэглэхийг хүсч байна” гэжээ.
Мөн тэрбээр: “Одоогоос хорин жилийн өмнө эхэлсэн ардчилсан хувьсгалын үр дүнд Монгол орон эдийн засаг, улс төрийн шилжилтийг нэгэн зэрэг хийхээр үндэсний хэмжээний зөвшилд хүрч чадсан билээ. Ийнхүү Монгол Улс бүх нийтээрээ нэгэн зүгт зорьсоноороо Ази тивд урьд өмнө байгаагүй амжилтанд хүрч, мөн томоохон сорилттой тулгарсан юм.
Бидний өмнө тулгарч байсан элдэв сорилтыг Монголын ард түмний эв нэгдэл, тайван байдлыг эрхэмлэгч холч ухаан, ялангуяа Монгол ээжүүдийн үр хүүхдийнхээ ирээдүйг дэмжсэн сэтгэлийн тэнхээгээр даван туулсан гэж хэлж болно” хэмээн онцлон тэмдэглэв.
Мөн Монголчуудаа ядуурлаас гаргах, байгаль орчин, хүнсний аюулгүй байдлын асуудлыг шийдвэрлэх, хувь хүний төлөвшил, хүмүүжил, нийгэмд шударга ёсыг эрхэмлэх үнэт зүйлсийг бэхжүүлэх, ардчилал хүний эрхийг хамгаалахад эмэгтэйчүүдийн уйгагүй, тууштай оролцоо улам их хэрэгтэй байгааг Ерөнхийлөгч илгээлтдээ дурьдсан бөгөөд Монголын бүх эхчүүд, эмэгтэйчүүд болон Эмэгтэйчүүдийн Холбооны мянга мянган гишүүд, дэмжигчидэд ойн баярын мэндчилгээ дэвшүүллээ.
