Монгол Улсын Ерөнхийлөгч ЦАХИАГИЙН ЭЛБЭГДОРЖИЙН Оросын Холбооны Улсад хийж буй албан ёсны айлчлал 2011 оны 5 дугаар сар 30-нд Москва хотноо эхэллээ. Монгол Улсын Ерөнхийлөгчийг “Шереметьево” олон улсын нисэх онгоцны буудалд хоёр улсын төрийн далбааг мандуулж, цэргийн хүндэт харуул жагсан угтан авав. Албан ёсоор угтах ёслолд ОХУ-ын Гадаад хэргийн дэд сайд А.Н.Бородавкин, ОХУ-аас Монгол Улсад суугаа Онц бөгөөд Бүрэн эрхт Элчин сайд В.В.Самойленко, ОХУ-ын ГХЯ-ны Төрийн ёслолын газрын дарга А.И.Яковлев болон албаны бусад хүмүүс оролцлоо.
Айлчлалын хүрээнд Монгол Улсын Ерөнхийлөгч Ц.Элбэгдорж, Оросын Холбооны Улсын Ерөнхийлөгч Д.А.Медведев нар өргөтгөсөн хэлэлцээ хийж, Монгол Оросын харилцаа хамтын ажиллагааны баримт бичгүүдэд гарын үсэг зурна. Мөн ОХУ-ын Засгийн газрын дарга В.В.Путин, ОХУ-ын Холбооны хурлын Төрийн Думын дарга В.В.Грызлов, ОХУ-ын Холбооны хурлын Холбооны зөвлөлийн даргын үүрэг гүйцэтгэгч А.П.Торшин нартай уулзаж, хоёр орны харилцаа хамтын ажиллагааны талаар санал солилцоно.
Мөн Ерөнхийлөгч Ц.Элбэгдорж , М.В.Ломоносовын нэрэмжит Москвагийн Их Сургуульд уригдан багш оюутнуудад лекц унших, Монгол-Оросын бизнес форумын хуралдаанд оролцож үг хэлэхээс гадна ОХУ-ын ШУА-ийн Дорно дахины гар бичмэл судлалын хүрээлэнд зочлох, Санкт Петербургийн Улсын Их сургуулийн Монгол судлалын тэнхимийн эрдэмтэн багш нартай уулзах зэрэг хөтөлбөр төлөвлөгөөтэй байна.
Түүнчлэн ОХУ-ын Бүгд Найрамдах Халимаг Улсын нийслэл Элстэй хотод айлчлах болно.
Монгол Улсын Ерөнхийлөгчийг дагалдан Гадаад харилцааны сайд Г.Занданшатар, Батлан хамгаалахын сайд Л.Болд, Зам тээвэр, барилга, хот байгуулалтын сайд Х.Баттулга, УИХ-ын гишүүн Р.Амаржаргал, Нийслэлийн Засаг дарга бөгөөд Улаанбаатар хотын захирагч Г.Мөнхбаяр, Хүнс, хөдөө аж ахуй, хөнгөн үйлдвэрийн дэд сайд Х.Золжаргал, Эрдэс баялаг эрчим хүчний дэд сайд Б.Ариунсан, Ерөнхийлөгчийн зөвлөх Л.Пүрэвсүрэн, Р.Болд нар ажиллаж байна. Мөн хэвлэл мэдээлэл, бизнесийн төлөөлөл айлчлалын бүрэлдэхүүнд багтаж байна.
Монгол Улсын Ерөнхийлөгч Цахиагийн Элбэгдоржийн Оросын Холбооны Улсад хийх айлчлал 2011 оны 6-р сарын 3 хүртэл үргэлжилнэ.
