Орос орны төдийгүй дэлхийн тэргүүлэгч сургуулиудын нэг, шинжлэх ухаан, соёл, түүхийн судалгааны төв болсон М.В.Ломоносовын нэрэмжит Москвагийн Их Сургуульд Монгол Улсын Ерөнхийлөгч Ц.Элбэгдорж зочилж, тус сургуулийн эрдэмтэд, багш оюутнуудад “Дэлхийн цаг агаарын өөрчлөлт” сэдвээр лекц уншлаа.
Улам бүр хурдацтай нэмэгдэж байгаа дэлхийн дулаарал хүн төрөлхтөний амьдралд ямар өөрчлөлт авчирч байгаа, хүмүүс бид өөрсдөө дулаарлаас үүдэлтэй сөрөг нөлөөллийг бууруулах талаар юу хийж болох тухай Ерөнхийлөгч Ц.Элбэгдорж өөрийн санал бодлоо эрдэмтэд, оюутнуудтай хуваалцлаа. Тэрээр, хэдэн мянган жилийн турш байгал дэлхийгээ хайрлаж, хамгаалж, байгалд ээлтэй байдлаар аж төрж ирсэн нүүдэлчдийн амьдралын онцлогийн талаар ярьсан.
Багш оюутнууд Ерөнхийлөгчтэй , дэлхийн цаг уурын өөрчлөлт хүний үйл ажиллагаанаас болж байна уу, эсвэл байгалийн үйл явц уу, 20 жилийн дараа манай дэлхий ямар болох, уул уурхайг хөгжүүлэхийн сөрөг тал болох газрын доройтол, усны хомсдлыг хэрхэн шийдвэрлэх, Хөвсгөл нуурын гүнд шумбах талаар төлөвлөж байгаа эсэх зэрэг олон сонирхолтой асуудлаар асуулт тавьж харилцан ярилцлаа.
Өнгөрсөн жил Байгал далайн гүнд 437 метрийн гүнд шумбахдаа нэг талаар оросын шинжлэх ухааны ололтыг бахархаж, нөгөө талаар эх дэлхийгээ, усаа хайрлах сэтгэлийг улам бүр мэдэрч байсан гэж Ерөнхийлөгч хэлээд Байгал нуур, Хөвсгөл нуурын судалгаа шинжилгээний ажлыг дэмжих болно гэв.
Ерөнхийлөгч болон Москвагийн Их Сургуулийнхны хооронд зөвхөн байгал хамгааллын төдийгүй, хоёр орны найрамдал харилцаа, хэл соёлын асуудлаар сонирхолтой яриа өрнөсөн. “Цагтаа манай сургуульд нэг хичээлийн жилд л гэхэд 50 орчим оюутан сурдаг байсан. Харин өнөөдөр 6 монгол оюутан байна. Хэдийгээр монголын залуучууд сүүлийн жилүүдэд орос хэлийг биш , өөр бусад хэлийг хамгийн сайн мэдэх ёстой гадаад хэлээрээ сонгож байгаа ч, бидний хооронд олон жилийн турш хөгжиж ирсэн хэл соёлын харилцаа хадгалагдсан үлдсэнд бид сэтгэл хангалуун байгаа” гэж Москвагийн Их Сургуулийн ректор В.А.Садовничий ярив.
Тэрээр Монгол Улсын Ерөнхийлөгчид, 1835 онд орос хэлнээ хэвлэгдсэн “Монгол хэлний дүрэм” номыг дурсгал болгон өгөв.
М.В.Ломоносовын нэрэмжит Москвагийн Их Сургууль нь 15 судалгааны хүрээлэн, 39 факультет, хилийн чанадад 6 салбар сургуультай, 35 мянга орчим бакалавр, магистр, аспирант, докторант, эрдэм шинжилгээний ажилтан, багш эрдэмтэдтэй , оросын шинжлэх ухаан, дээд боловсролын нэрийн хуудас болсон сургууль юм.
