Манай ууган хэвлэлүүдийн нэг “Улаанбаатар таймс” сонины хамт олонд наян жилийн намтар цадиг арвин баян түүхт ойн баярын мэндчилгээг өргөн дэвшүүлье.
Улс орныхоо 20 дугаар зууны хөгжил дэвшилд нийслэл Улаанбаатар хот маань амин чухал үүрэг гүйцэтгэсэн лугаа адилаар монголын хэвлэл мэдээллийн салбарын хөгжил, ялангуяа 1990 оноос хойш бий болсон шинэ нөхцөл байдалд ардчилсан чөлөөт сэтгүүлзүйг шинээр төлөвшүүлэн хөгжүүлэхэд танай сонины хамт олны гүйцэтгэсэн үүрэг, байгуулсан гавъяа зүтгэл нэн их гэдгийг онцлон тэмдэглэж байна.
1990-ээд онд чухам Улаанбаатар сонины хуудаснаас хамгийн шинэ сэргэг үзэл санаа, бүтээлч санаа бодол, хурдан шуурхай мэдээ мэдээлэл, мэдлэгт дуудсан нийтлэл, сурвалжлагууд гэрэл гэгээ мэт цацарч байсан билээ. Тиймээс ч хамгийн олон уншигчтай сонины нэг болж чадсан, тэр ч хэмжээгээрээ Улаанбаатар хотын хөгжилд ихээхэн хүндтэй үүрэг гүйцэтгэсэн юм. Мөн хотжилт, байгаль хамгаалах зэрэг амин чухал сэдвүүдийг хөндөн, нийгмийн анхаарлыг төвлөрүүлж чадсан юм.
Дорнын их найрагч Б.Явуухулан, дунд үеийн нэртэй яруу найрагч, сэтгүүлч Ү.Хүрэлбаатар нараас эхлээд монголын олон арван шилдэг сэхээтэн, бичгийн хүмүүс төрөн гарсан нь зөвхөн “Улаанбаатар таймс” сонины хамт олны бахархал төдийгүй чадвар чансааг илтгэдэг билээ.
Наян жилийн туршид Улаанбаатар хоттойгоо хөгжиж ирсэн танай хамт олон цаашид мэдээллийн орон зайгаа улам өргөтгөн тэлнэ гэдэгт итгэлтэй байна. Та бүхэнд ажлын өндөр амжилт хүсье!
МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖ
