Монгол Улсын Ерөнхийлөгч Ц.Элбэгдоржийн санаачилгаар “Монгол орны усны хангамжийн асуудлыг шийдвэрлэх нь” сэдэвт хурал өнөөдөр Их тэнгэр цогцолборт боллоо. Монгол Улсын Ерөнхийлөгчийн Тамгын газар, Давосын Дэлхийн Эдийн засгийн чуулга уулзалтын Усны нөөцийн бүлэг хамтран зохион байгуулж буй тус семинарын зорилго нь Монгол Улсад усны баталгаатай ирээдүйг хангахад чиглэсэн юм. Үүний тулд хөгжилд тулгарч буй асуудлыг тодорхойлж, зарим салбарын усны нөөцөд үзүүлэх нөлөөллийг гаргах, Монгол орны усны эргэлтийг хангах нөөц бололцоо, шаардлагатай хөрөнгө оруулалтын хэмжээг тодорхойлох, Усны хэрэгцээ, хангамжийн зөрүүгээс үүдэх нийгэм, эдийн засгийн нөлөөллийг судалж, тогвортой хөгжилд үзүүлэх нөлөөг тодорхойлох, Монгол орны ирээдүйн усны хэрэгцээг хангах арга зам, усны салбарыг хөгжүүлэх талаар ярилцлага өрнүүлэх үндсэн зорилготой юм.
Семинарын эхэнд нэгдсэн хуралдааныг Ерөнхийлөгчийн Байгаль орчин, амьдрах орчны бодлогын зөвлөх Э.Зоригт, Нестле групп, Усны нөөцийн бүлгийн Ерөнхийлөгч Петер Брабек-Лэтмате нар нээж үг хэлсэн юм. Дараа нь Дэлхийн эдийн засгийн чуулга уулзалтын Байгаль орчны салбарын тэргүүн Доминик Ворей “Усны нөөцийн бүлгийнп”-ийн тухай танилцуулга хийв. Мөн “Улс орнууд дахь Усны нөөцийн бүлгийн үйл ажиллагаа” сэдвээр Маккинзи ба Ко компаний Герман Улс дахь салбарын захирал доктор Мартин Стуктей мэдээлэл хийв.
Нэгдсэн хуралдаанд Усны үндэсний газрын нарийн бичгийн дарга Д.Доржсүрэн “Монгол орны усны хэрэгцээ, хангамжийн талаар тулгамдаж байгаа асуудал, бодлого, төлөвлөлт” сэдвээр, Маккинзи ба Ко компанийн салбарын захирал Дэвид Когман, судлаач Судийп Майтра нар “Монгол Улсын хөгжлийн асуудлуудыг усны нөөцийн хангамж, түүнд үзүүлэх нөлөөлөл дээр үндэслэн тодорхойлох нь” сэдвээр тус тус хэлэлцүүлэг зохиов.
Үдээс хойшхи салбар хуралдаануудад “Уул уурхайн салбар дахь усны хэрэгцээ, хангамж”, “Хөдөөгийн хүн ам, газар тариалан, малын бэлчээрийн усны хэрэгцээ, хангамж”, “Улаанбаатар хот болон бусад хот, сум суурингийн усны хэрэгцээ, хангамж” зэрэг сэдвүүдээр явагдаж, Монгол орны усны салбарын цаашдын чиг хандлагын талаар хэлэлцүүлэг болж, цаашид авах арга хэмжээний талаар дүгнэлт гаргалаа.
