Монгол Улсын Ерөнхийлөгч Цахиагийн Элбэгдоржийн Оросын Холбооны Улсад хийж буй айлчлал Санкт-Петербург хотод үргэлжилж байна. Ерөнхийлөгч Ц.Элбэгдорж тус хотын захирагч В.И.Матвиенког хүлээн авч уулзлаа. Санкт-Петербург бол ОХУ-ын Холбооны хотын статустай оросын хоёр дахь том хот бөгөөд 5 сая хүн амтай. Улсдаа томоохонд тооцогдох боомт хот, төмөр зам, агаарын замын чухал зангилаа, оросын эдийн засгийн хөгжлийн томоохон бүс, шинжлэх ухаан, соёл боловсролын төв болсон хот билээ.
Энэ хотод айлчлахаар ирж байгаа нь санамсаргүй хэрэг биш гэдгийг Ерөнхийлөгч Ц.Элбэгдорж ярианыхаа эхэнд дурдлаа.
“Дэлхийн түүх соёлын арвин их сан хөмрөг болсон Санкт-Петербург хотод хадгалагдаж байгаа монголын түүх, соёлд хамаарах хосгүй үнэт бүтээл, ховор үзмэрүүдийг хамтран судлах, хамгаалах, монголын үзэгчдэд дэлгэн үзүүлэх, шинжлэх ухааны ажилтан, эрдэмтэн судлаачдыг харилцан солилцох хүсэлтэй байна. Монголын түүхийн гэрч болсон ховор бүтээлүүдийг судлах, хамгаалах ажлыг төрийн зүгээс тууштай дэмжих болно.
Бидний боловсролын салбар дахь уламжлалт харилцаа, хамтын ажиллагаа хадгалагдаж байгаад бид баяртай байна. Цаашдаа эрчим хүч, машин механизмын үйлдвэрлэлийн чиглэлээр оюутан сургах шаардлага улам бүр гарч байна” гэж Ерөнхийлөгч ярив.
1920 оноос эхлэн манай орноос Санкт-Петербург хотод оюутан суралцаж эхэлсэн бөгөөд, хожмын шилдэг сэхээтнүүд олноороо сурч байлаа. Өнөөдрийн байдлаар ОХУ-д 1500 гаруй оюутан суралцаж байгаагаас Санкт-Петербург хотод 206 нь суралцаж байна. Тэдгээрийн 201 нь ОХУ-ын Засгийн газрын тэтгэлгээр суралцдаг оюутнууд юм байна.
Санкт-Петербург хотын захирагч, хатагтай В.И.Матвиенко Монгол Улсын Ерөнхийлөгчийг тус хотод саатан айлчилж байгаад талархал илэрхийлээд боловсрол, түүх, шинжлэх ухааны салбарын хамтын ажиллагааг өргөжүүлэхийг дэмжиж байна гэв. Тэрээр, өнөөдөр би Улаанбаатор хотын захирагчтай биечлэн танилцаж байгаадаа баяртай байна , ойрын үед Санкт-Петербург болон Улаанбаатар хотуудын хооронд түншлэл хамтын ажиллагааны гэрээ байгуулья гэлээ.
Улаанбаатар Санкт-Петербург хотуудын хооронд бизнес холбооо тогтоох, энэ хүрээнд Санкт-Петербург хотод монголын бизнес форум зохион байгуулах санал хэлэв. Ерөнхийлөгч холбогдох газруудад энэ чиглэлээр үүрэг өгөхөөр болов.
Ерөнхийлөгч Ц.Элбэгдорж, Эрмитажийн музей, Дорно дахины гар бичмэл судлалын хүрээлэн, аугаа Петрийн нэрэмжит антрополог, угсаатны зүйн музей Кунсткамера орж, монголын соёлын өвүүдтэй танилцсан тухайгаа ярив. Хоёр ерөнхийлөгчийн ивээл дор оросын архивуудад байгаа монголын түүх соёлын өвийг хамтран судлах , бүртгэх ажлыг ойрын хугацаанд хийе гэдэг дээр тохирлоо.
Хатагтай В.И.Матвиенко бол Оросын Холбооны Улсын ерөнхий сайдын орлогчийн албан тушаалыг олон жил хашч байсан, гадаад орнуудад элчин сайдаар сууж байсан туршлагатай улс төрч, дипломатч юм.
