ОХУ-ын Ерөнхийлөгчийн урилгаар албан ёсны айлчлал хийж буй Монгол Улсын Ерөнхийлөгч Ц.Элбэгдорж Санкт-Петербургийн нисэх онгоцны “Пулково-1” буудлаас Халимагийн нийслэл Элстэй орохоор 6 дугаар сарын 2-ны үдээс хойш мордлоо.
Элстэйд Ерөнхийлөгчийг хүрэлцэн ирэхэд Халимаг улсын тэргүүн А.М.Орлов, Засгийн газрын дарга Л.Н.Иванова, Ардын хурлын дарга А.В.Кочачко нар угтан авав. Ерөнхийлөгч Ц.Элбэгдорж энд Халимаг улсын тэргүүн А.М.Орлов, Засгийн газрын гишүүдтэй уулзана. Дараа нь тус улсад монгол гэр бэлэглэх ёслол үйлдэж, ахмадуудтай уулзан, монгол, халимагийн уран бүтээлчдийн хамтарсан тоглолт үзнэ. Мөн “Мөнхийн гал” дурсгалын цогцолборт цэцэг өргөж, “Бурхан багшийн алтан өргөө” хийдэд зочлон Халимагийн үндэсний их сургуульд багш, оюутнуудтай уулзана.
