Халимаг улсад гэр бэлэглэх ёслол зургадугаар сарын 2-нд Элстэй хотын төвд боллоо. Зургаан ханатай, сийлбэртэй орд цагаан өргөө гэрийг хүлээлгэн өгөхөөр Монгол Улсын Ерөнхийлөгч Ц.Элбэгдоржийг хүрэлцэн ирэхэд тэнд цугласан халимагчууд сүүтэй цай, боорцог барин угтаж, алд цагаан хадаг хүзүүнд нь зүүв. Ерөнхийлөгч өргөөнд орж хоймор зассан ширээнд Халимаг Улсын тэргүүн А.М.Орловтой тухлан суухдаа гэрийнхээ талаар танилцууллаа. Ингээд Ерөнхийлөгч монгол гэрийн батламж бичгийг уншин А.М.Орловт гардуулан өгөв.
