Монгол Улсын Ерөнхийлөгч, Зэвсэгт хүчний Ерөнхий командлагч Ц.Элбэгдорж өнөөдөр Батлан хамгаалах яаманд хүрэлцэн очиж, “Дархан-2” тактик тусгай бэлтгэлийн сургалт, дадлагын хаалтын үйл ажиллагаанд оролцлоо.
Өнгөрөгч наймдугаар сарын 23-нд нээлтээ хийсэн Монгол Улс, ОХУ-ын Зэвсэгт хүчний хамтарсан энэхүү “Дархан-2” энхийг сахиулах ажиллагааны тактик тусгай бэлтгэлийн сургалт, дадлага амжилттай зохиогдож өндөрлөсөнд Ерөнхийлөгч Ц.Элбэгдорж баяртай байгаагаа илэрхийлж Монгол, Оросын цэрэг дайчдад баяр хүргэн үг хэлсэн юм.
Тэрбээр хэлсэн үгэндээ өнө удаан жилийн буурал түүхтэй, мөнхий хөрш манай хоёр орны цэрэг дайчид 70 жилийн өмнө дайны талбарт мөр зэрэгцэн тулалдаж явсан бол одоо энхийн цагт хамтарсан бэлтгэл сургуулилалт хийж үүрэг зорилгоо амжилттай биелүүллээ. Энэхүү үйл ажиллагаа нь Монголын Зэвсэгт хүчний шинэчлэлийг гүнзгийрүүлэх, харилцан туршлага солилцох, үүрэг гүйцэтгэх боломж, чадавхийг нэмэгдүүлэхэд бодитой тусламж, дэмжлэг үзүүлээд зогсохгүй манай хоёр орны ард түмний найрамдал, дайчин нөхөрлөлийг бэхжүүлэхэд үнэтэй хувь нэмэр оруулсан гэдэгт эргэлзэхгүй байна хэмээн онцлов.
Түүнчлэн энэ удаагийн сургалт, дадлага нь “Зэвсэгт хүчний байгуулалтыг 2015 он хүртэл хөгжүүлэх хөтөлбөр”-т зэвсэглэл, техникийг шинэчлэх сайжруулах талаар дэвшүүлсэн зорилго, зорилтыг хэрэгжүүлэх чухал алхам болохыг тэмдэглээд цаашид ийм бодитой, олон талт хамтын ажиллагааг хөгжүүлэх бүхий л санал, санаачлагыг тууштай дэмжиж ажиллахаа илэрхийллээ.
Мөн энэ үеэр уг сургалт, дадлагад идэвх зүтгэл гарган оролцож, үүргээ нэр төртэй гүйцэтгэсэн Монгол, Оросын Зэвсэгт хүчний зарим тэргүүний генерал, офицер, ахлагч нарт шагнал гардууллаа. Тухайлбал “Найрамдал” медалиар Сибирийн цэргийн тойргийн командлагч, хурандаа генерал П.А.Николаевичийг шагнасан бол “Энхийн төлөө” медалийг Зэвсэгт хүчний хяналт-шалгалт үнэлгээний газрын орлогч дарга Ц.Доржхүү, ЗХЖШ-ын хяналт хэмжил зүйн техникийн албаны дарга хурандаа Ж.Жаргалсайхан нарын 26 хүн хүртсэн байна.
“Дархан-2” сургалт дадлагад Монголын талаас Зэвсэгт хүчний есөн ангийн 400 гаруй, ОХУ-ын талаас 230 гаруй инженер, техникийн албан хаагчаас бүрдсэн сэргээн засварлах засварын тусгай батальеонууд оролцож, 500 гаруй нэгж техник, хэрэгсэлд дунд болон урсгал засвар, сэргээн сайжруулах техникийн үйлчилгээ хийсэн бөгөөд үүнд шаардагдах сэлбэгийг ОХУ-ын талаас нийлүүлсэн юм.
