Монгол Улсын Ерөнхийлөгч Ц.Элбэгдорж ОХУ-ын Бүгд Найрамдах Халимаг Улсад айлчлах үеэрээ “Бурхан багшийн алтан өргөө” хийдэд зочиллоо. 1990-ээд оны үед буддын нэг ч сүм хийдгүй байсан Халимагт өнөөдөр шашин шүтлэг сэргэж, өнгөрсөн 20 гаруй жилийн хугацаанд 27 сүм хийдтэй болсон байна. Тэдгээрээс хамгийн том нь энэхүү Элстэй хотын төвд байх “Бурхан багшийн алтан өргөө” хийд юм.
Энэ хийд нь 2005 онд шаваа тавьж, 2006 онд Далай лам Бүгд Найрамдах Халимаг Улсад айлчлах үеэрээ хийдийн нэрийг өгчээ.
Зөвхөн хурал ном хураад зогсохгүй, иргэдэд буддын шашны ном судар, түүхийн талаарх мэдээллийг цогцоор нь өгдөг нь энэ хийдийн онцлог юм. Хийдийн доод давхарт номын сан, кинотеатр, гэрэл зургийн үзэсгэлэн, буддын шашны судлалын төв ажилладаг. Сүсэгтэн олны өргөл барьцийг зөвхөн хийдийн үйл ажиллагаанд зориулаад зогсохгүй, буяны үйл, мөн шашны ховор ном судрыг хамгаалж, судлахад зориулдаг байна.
