Монгол Улсын Ерөнхийлөгч Ц.Элбэгдорж Элстэй хотын ойролцоохь “Ойратский стан” фермерийн аж ахуйтай танилцав. Эднийх үхэр, адуу, хонь үржүүлдэг юм байна. Ерөнхийлөгчийг очиход сүргийн манлай хэд хэдэн хуц, бух, хоёр морь, нэг тэмээ билчээрээс нь авчирсан байв. Өрхийн тэргүүн малаа танилцуулахдаа, хуц, нас гүйцсэн эр хонь 110 кг, эм хонь 65 кг татдаг гэлээ. Хонь нь ууц, сүүлэн дээр нь дахиад нэг ууц сүүл давхарлаад тавьчихсан мэт харагдаж байв. Хэдэн сайхан монгол бух байлаа. Эзнийх нь ярьснаар халимагууд нутгаасаа гараад 400 жилийн нүүр үзэж буй ч үхрийн ген нь өөрчлөгдөөгүй, бас ямар ч цаг уурын нөхцөлд дасан зохицох чадвартай юм байна.
Махны чиглэлээр үхэр өсгөдөг болохоор бух нь үнэхээр том биетэй юм. Эхний бухыг 936 кг жинтэй, үр төл нь 17 сартайдаа 450 кг, 4 настайдаа 760 кг болдог гэж ярив. Бас 1270 кг жинтэй нэг бухыг хамгийн алдартай үүлдрийнх гэж хэлэв. Халимаг үхэр их хурдан тарга хүч авдаг дотор өөх нь л гэхэд 60-70 кг хүрдэг учир хүйтрэхэд огт ажирдаггүй гэнэ. Элетрон ээмэгтэй тул компьютерээс бүх үзүүлэлтийг нь, тухайлбал хэзээ, хэдэн кг жинтэй төрсөн, эх болон хээлтүүлэгчийн нэр, дугаар, одоогийн амьдын жин гээд олон зүйлийг харах боломжтой юм. Махны чиглэлийн үхрийг саадаггүй бөгөөд бүгд 3-4 дүгээр сард төллөөд дуусдаг, 100 эхээс 90-95 тугал авдаг юм байна. Халимагт нийт 7 үүлдрийн адуу үржүүлж, Франц, Герман гээд хилийн чанадад борлуулдаг аж. Хоёр настай адуу нь манай нас гүйцсэн морь шиг том биетэй харагдлаа.
Ерөнхийлөгч гэрт нь орж цай амсав. Гэрийн эзэгтэй Татьяна Озаева аж ахуйгаа удирдаж, хажуугаар нь хэдэн монгол гэр барьж дулааны улиралд амрагчид, жуулчин хүлээн авч орлогоо нэмэгдүүлдэг гэлээ. Эднийх саяхан ач охинтой болж, Өүлэн нэр өгсөн тухайгаа хуучлав. Дахиад охин гарвал Бүртэ , хүү төрвөл Элбэг гэж нэр өгнө гэж байлаа. Халимагууд зочин гийчнээ сүүтэй цай, боорцог, бууз, чанасан хонины махаар дайлдаг юм байна.
Үүгээр Монгол Улсын Ерөнхийлөгчийн ОХУ-ын Бүгд Найрамдах Халимаг Улс дахь айлчлал өндөрлөж, 6-р сарын 3-ны өдөр эх орны зүг мордлоо.
