Монгол Улсын Ерөнхийлөгч Ц.Элбэгдорж ОХУ-д хийсэн албан ёсны айлчлалынхаа мөрөөр авах арга хэмжээг эрчимжүүлэх асуудлаар Монгол Улсын Тэргүүн шадар сайд Н.Алтанхуяг, ХХААХҮ-ийн сайд Т.Бадамжунай, Зам тээвэр, барилга, хот байгуулалтын сайд Х.Баттулга, Эрдэс баялаг, эрчим хүчний сайд Д.Зоригт, Цөмийн энергийн газрын дарга С.Энхбат, Гадаад харилцааны яамны Төрийн нарийн бичгийн дарга Д.Цогтбаатар, тус яамны хөрш орнуудын газрын захирал О.Энхтөр нарыг өнөөдөр хүлээн авч уулзан, үүрэг даалгавар өглөө.
Ерөнхийлөгч хэлэхдээ “ ОХУ-д хийсэн айлчлал харилцан ойлголцсон, ажил хэрэгч уур амьсгалд боллоо. Зарим уулзалт товлосон цагаасаа ч удаан үргэлжилсэн. ОХУ-ын Ерөнхийлөгч Д.А.Медведев, Засгийн газрын дарга В.В.Путин нартай уулзаж яриа хэлэлцээ хийхэд ажил хэрэгчээр хандаж, сайдууд, холбогдох хүмүүсээ байлцуулан саналыг нь сонсон нэгдсэн ойлголтоор асуудлыг шийдвэрлэхийг хичээж байсан. Энэ нь их чухал ач холбогдолтой боллоо. Дүгнэж хэлэхэд хоёр тал бодит ойлголтод хүрч, харилцаа, хамтын ажиллагааг шинэ шатанд гаргахад айлчлал чухал үүрэгтэй боллоо. Ерөнхийлөгч Д.А.Медведев болон Засгийн газрын дарга В.В.Путин нартай өргөн хүрээний олон асуудлыг хөндөж ярьсан. 1949 оны төмөр замын гэрээг шинэчлэхээр тохиролцлоо. Энэ талаар олон асуудлаар ярилцан ганц хоёроос бусдаар нь нэгдмэл байр суурьт хүрлээ” гэв. Үлдсэн асуудлаар ажил хэрэгч яриа хэлэлцээ хийхийг Зам тээвэр, барилга, хот байгуулалтын сайд Х.Баттулгад үүрэг болгов.
Зарим барааны худалдааг ард иргэд, бизнес эрхлэгчдэд чирэгдэлгүй болгох асуудлыг ажлын хэсгийн хүрээнд Гадаад харилцааны яам, Хүнс, хөдөө аж ахуй, хөнгөн үйлдвэрийн яам анхаарч ажиллахыг даалгалаа. Малын гаралтай бүтээгдэхүүний эрүүл ахуйн шаардлагыг хангахад ОХУ-аас вакцин олгох болсон нь ихээхэн ач холбогдолтойг тэмдэглээд хоёр тал хамтран ажиллаж, мах, махан бүтээгдэхүүнийг ОХУ-ын зах зээлд гаргах асуудлыг ХХААХҮ-ын сайд Бадамжунайд үүрэг болгов.
Мөн Монголд гадаадын компаниудад нефть бүтээгдэхүүн жижиглэнгээр борлуулах зах зээл байхгүй гэдгийг Оросын талд ойлгуулсан гээд цаашид дотоод боломждоо тулгуурлан хэрэгцээнийхээ тодорхой хувийг өөрсдөө хангах асуудлыг Засгийн газраар ул суурьтай хэлэлцээд ҮАБЗ-д оруулж ирэхийг Эрдэс баялаг, эрчим хүчний сайд Д.Зоригтод үүрэг болгов. Ашигт малтмал, уран, Таван толгойтой холбоотой асуудлаар хөрш орныхоо хүсэлтийг харгалзаж байх, нэгдсэн бодлогоор хандаж ажиллахыг Зоригт сайд болон Цөмийн энергийн газрын дарга С.Энхбат нарт анхаарууллаа.
Ерөнхийлөгч цааш нь хэлэхдээ “Монгол Улс бүс нутгийн болон дэд бүтцийн, тухайлбал нефть, шатдаг хий дамжуулах хоолой тавих зэрэг томоохон төслүүдэд оролцох сонирхолтойг дэмжихийг ОХУ-ын удирдлагуудаас хүслээ. ОХУ-ын удирдлагууд ойлгон хүлээн авсан. Монгол Улс ОХУ-ын найдвартай түнш баймаар байна гэдгээ ч хэлсэн. Манай төлөөлөгчид ОХУ-ын Санкт-Петербург, Элстэй хотуудаар айлчиллаа. Соёл, боловсрол, шинжлэх ухааны салбарын хамтын ажиллагаа, оюутан солилцооны асуудлаар томоохон ахиц гаргалаа.
Айлчлалын дараа манайхан тайвширдаг. Айлчлалаар ярилцсан асуудлаар одоо чиглэл чиглэлээрээ ажилдаа орох хэрэгтэй байна. Ерөнхий сайд С.Батболдтой уулзаж, айлчлалаар хөндсөн асуудлуудаар санал солилцсон. Айлчлалын бүрэлдэхүүнд зарим яам, агентлагийн холбогдох хүмүүс ороогүй учраас та бүхнийг зориуд хүлээн авч уулзан үүрэг өгч байна.
Манай яам хоорондын ажлын уялдаа муу байна. Албаны хүмүүс нэгдсэн байр сууринаас асуудалд ханддаггүй, ашиг сонирхлын зөрчилдөө хөтлөгддөг тал ч ажиглагдаж байна. Хэвлэл, мэдээлэлд хөтлөгдөлгүй мэдээллээ зөв өгч, үр дүнг Засгийн газартаа тодорхой тайлагнан ажиллах хэрэгтэй. Ганц жишээ дурдахад Гадаад харилцааны яамны газрын дарга элчин сайдуудыг эргүүлэх татах албан бичиг явуулсныг харлаа. Онцгой тохиолдлоос өөр үед ингэх ёсгүй. Занданшатар сайдтай энэ талаар уг нь ярилцаж, элчин сайдууд өөрсдөө өргөдлөө гаргавал Ерөнхийлөгч хүсэлтийг нь хүлээн авч болохыг хэлсэн шүү дээ. Цаашид Засгийн газар, УИХ, Ерөнхийлөгч, Үндэсний аюулгүй байдлын зөвлөлийн түвшинд ярилцаж тохиролцсоны дараа нэгдсэн байр суурь, нэгдмэл ойлголттойгоор асуудалд хандаж байх хэрэгтэй” гэв
