Байгаль экологийн тэнцвэрт байдал алдагдан хүн төрөлхтөнд нүүрлээд байгаа уур амьсгалын өөрчлөлт, цөлжилт, агаар, хөрсний бохирдол, хог хаягдлын эсрэг нэгдэх уриалгыг дэлхийн олон улсад гаргаад буй “Эх дэлхийн ногоон хөгжил торгон тууз” аяны төлөөлөгчид өнөөдөр Монгол Улсын Ерөнхийлөгчид бараалхаж аяныхаа зорилгыг танилцуулав.
Монгол Улсын Ерөнхийлөгчийн дэлхийн дулаарал, уур амьсгалын асуудлаар баримталж буй байр суурь, Копенгагены чуулганд хэлсэн үг, мөн бүх нийтээрээ мод тарих үндэсний өдөртэй болох тухай зарлигийг дэмжиж тус аяны хүрээнд дэлхийн дулаарлын эсрэг тэмцэгч Канад Улсын иргэн Сатиш Сиха, 2008 оны Дэлхийн мисс, Энэтхэг Улсын гоо бүсгүй Парвати Оманакүтан, Косова Улсын мисс Таракү Морена, Монтенегро Улсын хүмүүнлэгийн элч, мисс Станисик Нина нар Монгол Улсад зочилж буй юм.
Монгол Улсын Ерөнхийлөгч Ц.Элбэгдорж тус аяны ногоон туузан дээр “Эх дэлхийгээ эрүүл ногоон, энх тайван болгохын төлөө нэгдэе” хэмээн бичиж гарын үсгээ зуран Эх дэлхийн ногоон хөгжил аянд нэгдэж буйгаа илэрхийлэн дэлхий дахины сайн сайхны төлөөх үйлсэд чин сэтгэлээсээ гар бие оролцон хүн төрөлхтөнд уриалга гаргаад буй төлөөлөгчдөд баяр хүргэн амжилт хүсэв.
