Улаанбаатар хот
Монгол Улсын Ерөнхийлөгч Ц.Элбэгдорж, Давосын Дэлхийн эдийн засгийн чуулга уулзалтын Усны нөөцийн бүлгийн дарга ноён Петер Брабек Летмате нар Монгол Улсын усны салбарын шинэчлэлтэнд дэмжлэг үзүүлэх зорилгоор төр засгийн холбогдох байгууллагууд, иргэний нийгмийн төлөөлөл, хувийн хэвшлийн оролцогчдоос бүрдсэн Монголын Усны холбоо байгуулахаар боллоо.
Монгол Улсын Ерөнхийлөгч Ц.Элбэгдоржийн урилгаар Дэлхийн эдийн засгийн чуулга уулзалтын Усны нөөцийн бүлэг Монгол Улсын Ерөнхийлөгчийн Тамгын газартай хамтран “Монгол орны усны хангамжийн асуудлыг шийдвэрлэх нь” хурлыг Улаанбаатар хотноо Их тэнгэр цогцолборт 2011 оны 6 дугаар сарын 3-ны өдөр зохион байгуулав. Хуралд Улсын Их Хурлын гишүүд, төр засгийн байгууллагын албаны хүмүүс, иргэний нийгэм, хувийн хэвшлийнхэн нийт 100 гаруй хүн оролцож, Монгол орны эдийн засгийн хурдтай өсөлтийг хангах хүрээнд усны багахан нөөцийг хэрхэн хамгаалах арга замыг эрэлхийлсэн юм.
Хурлаар уул уурхай, хөдөө аж ахуйн салбар, хотын ус хангамжийн тогтолцоон дахь усны хэрэглээнд тулгарч буй асуудал, усыг илүү үр дүнтэй ашиглах олон улсын сайн практикийн жишээ, Монгол орны усны нийлүүлэлтийг хамгаалах арга замын талаар хэлэлцэв. Манай орны усны салбар дахь төр засаг, хувийн хэвшлийнхний мэдээлэл, үйл ажиллагааг зохицуулах, манай орны эдийн засгийн сонголтыг гүнзгийрүүлэхэд бүх салбарынхныг оролцуулсан арга хэмжээ яаралтай авах, практик хэрэгцээ, нийлүүлэлтийн хувилбаруудыг тодорхойлж, эрчимтэй хэрэгжүүлэх төлөвлөгөө боловсруулах шаардлагатай байгаа талаар хуралд оролцогчид санал нэгдлээ.
Монгол Улсын Ерөнхийлөгч Ц.Элбэгдоржид Давосын Дэлхийн эдийн засгийн чуулга уулзалтын Усны нөөцийн бүлгийнхэн 6 дугаар сарын 4-нд бараалхаж, хурлын үр дүнгийн талаар тайлагнасан юм.
Энэ үеэр Монгол Улсын Ерөнхийлөгч Ц.Элбэгдорж, ноён Петер Брабек Летмате нар Монгол улсын усны салбарын шинэчлэлтэнд дэмжлэг үзүүлэх зорилгоор Давосын Дэлхийн эдийн засгийн чуулга уулзалтын Усны нөөцийн бүлэгтэй хамтран Монголын төр засгийн холбогдох байгууллага, иргэний нийгмийн төлөөлөл, хувийн хэвшлийн оролцогчдоос бүрдсэн Монголын Усны холбоо байгуулахаар боллоо.
Ерөнхийлөгч Ц.Элбэгдорж: “Манай орны усны ирээдүйн хэрэгцээг зохицуулах нь Монгол Улсын эдийн засгийн өсөлтийг тогтвортой байлгахад чухал юм. Усны Үндэсний төлөвлөгөөгөө шуурхай, үр дүнтэй хэрэгжүүлэх ёстой. Үүнийг хийхэд бид Давосын Дэлхийн эдийн засгийн чуулга уулзалтын Усны нөөцийн бүлгийн олон улсын сүлжээ, туршлагаас бид туслалцаа авна” гэв.
Ноён П.Б.Летмате: “Монгол орны эдийн засгийн өсөлтөд ус хэрэгтэй гэдгийг зөвшөөрч буй Ерөнхийлөгч Ц.Элбэгдоржийн алсыг харсан удирдлага, манлайлалд баяр хүргэе. Эдийн засгийн өсөлтийн төлөвлөгөөнд нийцсэн усны эх сурвалжийн тогтвортой менежментийн практик шийдлийг олохоор Усны нөөцийн бүлгийн дэмжлэгтэйгээр манлайлан ажиллаж буй Мексик, Иордан, Өмнөд Африк зэрэг орнуудын эгнээнд Монгол Улс орж ирэх гэж байгаад бид баяртай байна” гэлээ.
Уул уурхайн их баялагтаа голчлон тулгуурлан Монгол Улсын эдийн засаг ирэх 20 жилд 4 фактороор өсөх төлөвтэй байна. 1 метр куб хүдрийг олборлохын тулд 4 метр куб ус хэрэглэдэг, Монголын ашигт малтмалын ихэнх ордууд ус ховор нутагт олдсон тухай Монголын усны мэргэжилтнүүд саяын болж өнгөрсөн хурал дээр тэмдэглэж байсан юм.
Давосын Дэлхийн эдийн засгийн чуулга уулзалтын Усны нөөцийн бүлгийн тухай
Давосын Дэлхийн эдийн засгийн чуулга уулзалтын Усны нөөцийн бүлэг нь улс орны эдийн засгийн хөгжлийн төлөвлөгөөг дэмжих зорилгоор төр, хувийн хэвшил, иргэний нийгэм, боловсрол, судалгааны мэргэшсэн төв, санхүүгийн байгууллагынхны хамтын ажиллагаа, баримтанд тулгуурласан, аналитик дүн шинжилгээний аргачлалтай эвсэл байгуулах санаачлагыг ажиллуулах зорилготой шинийг санаачлагч төр-хувийн хэвшлийн хамтарсан талбар юм. Тус бүлэг нь усны салбарын тогтвортой шинэчлэлтийг хангахад төр засагт дэмжлэг үзүүлдэг.
Усны салбарын цогц шинэчлэлтийн стратеги дээрээ тус бүлгийг ажиллахыг урьсан улс орнуудтай Усны нөөцийн бүлэг хамтран ажиллаж, үүнийг нь дэмжих төр-хувийн хэвшлийн хамтын ажиллагааны аргачлал бий болгож өгдөг.
Усны нөөцийн бүлгийн гол түншүүд нь Кока Кола компани, Олон улсын санхүүгийн корпораци, Маккинзи ба Компани, Нестле, Пепси Ко, Швейцарийн хөгжил, хамтын ажиллагааны агентлаг, Веолиа Байгаль орчин зэрэг байгууллага юм.
Энэхүү санаачлагын дараагийн томоохон алхам нь Олон улсын санхүүгийн корпорацийн хүрээнд усны олон улсын байгууллагын бүтцийн хэсэг болсон шинэ глобал байгууллага байгуулах байх юм.
Дэлгэрэнгүй мэдээллийг www.weforum.org/issues/water вэбнээс үзэх юмуу Давосын Дэлхийн эдийн засгийн чуулга уулзалтын ахлах захирал Доминик Варэйтэй dominic.waughray@weforum.org имэйлээр холбоо барина уу.
Ричард Эллиот, Мэдээллийн дэд дарга
Дээрхи Давосын Дэлхийн эдийн засгийн чуулга уулзалтын хэвлэлийн мэдээг тус байгууллагын http://www.weforum.org/news/mongolian-president-declares-intent-form-new-alliance-water-security?fo=1 вэбээс авав.
