Монгол Улсын Ерөнхийлөгчийн ивээл дор “Уур амьсгалын өөрчлөлт ... Бид юу хийж чадах вэ?” олон улсын зуслангийн ажилтнуудын бага хурлын нээлтийн нэгдсэн хуралдаан өнөөдөр төрийн ордонд болов.
Монгол Улсын Шадар сайд М.Энхболд хуралдааныг нээж хэлэхдээ “Энэ цаг үед улс үндэстэнг ялгаварлалгүй нөлөөлөгч хүчин зүйл бол уур амьсгалын өөрчлөлт юм. Тиймээс санаа бодлоо уралдуулан ногоон эх дэлхийнхээ төлөө нэгдэцгээе. Хүүхэд залуучууддаа ногоон хөгжил, түүний үндсийг ойлгуулахад энэ бага хурлын ач холбогдол оршиж байгаа юм” гэв. Мөн Монгол Улсын Ерөнхийлөгчийн байгаль орчин, амьдрах орчны бодлогын зөвлөх Э.Зоригт бага хурлын үйл ажиллагаанд амжилт хүсч үг хэлэхдээ “Юуны өмнө манай оронд алс холоос хүрэлцэн ирж, энэхүү бага хуралд оролцож байгаа зочид Та бүхэнд Нарлаг Монгол оронд маань тавтай морилохыг хүсэн ерөөе. Мөн энэ арга хэмжээнд оролцож буй хүүхэд багачууддаа, Засгийн Газар, яам, агентлаг, ТББ-ын төлөөлөл, хүүхдийн байгууллагын ажилтнуудад чин сэтгэлийн талархал илэрхийлье.
Өнөөдөр манай гариг дээр хурдацтай явагдаж буй уур амьсгалын өөрчлөлт, дэлхийн дулаарлын нөлөөгөөр байгаль, бидний амьдрах орчинд асар их өөрчлөлт гарч, энэ нь улс орнуудын болон бүс нутгийн, улмаар нийт хүн төрөлхтний өмнө хамгийн тулгамдсан асуудал болоод байна.
Монгол Улсын газар нутаг далайн түвшнээс дээш дунджаар 1600 м өндөрт оршдог онцлогоос шалтгаалан уур амьсгалын өөрчлөлт, дэлхийн дулаарлын нөлөөлөлд хамгийн ихээр өртөж буй юм. Улс үндэстнүүд цаашид урт удаан хугацаанд тогтвортой хөгжих нь уур амьсгалын өөрчлөлтөд хэрхэн дасан зохицож амьдрах, хэрхэн зөв төлөвлөж, байгальд ээлтэй үйл ажиллагаа явуулахаас ихээхэн хамаарна. Монгол Улсын Ерөнхийлөгч Цахиагийн Элбэгдорж өөрийн бодлого үйл ажиллагааны хөтөлбөрөө “Иргэн төвтэй бодлого, байгальд ээлтэй хөгжил, өрсөлдөх чадвартай Монгол” гэсэн үндсэн 3 тулгуур бодлогоор тодорхойлсон бөгөөд байгаль орчны асуудалд онцгой анхаарал хандуулан ажиллаж байна. Монгол Улсын Ерөнхийлөгч 2009 оны 9 дүгээр сарын 1-ний хичээлийн шинэ жилийн нээлтээр “Дэлхийн дулаарал ба байгаль орчноо хамгаалах нь” сэдэвт теле-хичээлийг нийт хүүхэд, сурагчдад зориулан зааж, улс орон даяар шууд нэвтрүүлсэн билээ. Энэ арга хэмжээ нь хүүхдийн, мөн хүүхдээр дамжуулан насанд хүрэгчдийн экологийн боловсролыг дээшлүүлэх шинэлэг бөгөөд тулгамдсан асуудалд олон нийтийн анхаарлыг хандуулж чадсан арга хэмжээ болсон юм.
Өнөөдрийн энэ бага хурал Монгол Улсын Ерөнхийлөгчийн бодлого, үйл ажиллагааны хүрээнд бүрэн нийцэж, “Ерөнхийлөгчийн ивээл дор” явагдаж байгааг тэмдэглэхэд таатай байна. Монгол Улсын Ерөнхийлөгч олон улсын түвшинд ч олон санал санаачилга гаргаж, уур амьсгалын өөрчлөлтөд ихээр нэрвэгдэж байгаа бүс нутагт дэлхий нийтийн анхаарлыг хандуулахыг уриалан ажиллаж байна. Үүний тод жишээ нь Монгол Улсын Ерөнхийлөгчийн санаачилгаар Засгийн газар 2011 оны 8 дугаар сард Өмнөговь аймгийн Баяндалай сумын цөлжиж буй нутагт ээлжит хуралдаанаа хийж, НҮБ, олон улсын байгууллагууд, ард иргэдээ хандан цөлжилтийг сааруулахад хамтарч ажиллах уриалга гаргасан юм.
Монгол орон жилд 7,5 км хурдацтайгаар цөлжиж, үүнд нийт газар нутгийн 70 гаруй хувь нь ямар нэгэн хэмжээгээр нэрвэгдээд байна. Олон гол горхи, нуур цөөрөм хатаж, ширгэж байна. МАА эрхэлж байгальтайгаа хамгийн ойр амьдардаг монголчуудын хувьд уур амьсгалын өөрчлөлтийн нөлөө улам бүр мэдрэгдэж, өдөр тутмын амьдрал, ахуй орлогод нь ч сөргөөр нөлөөлж байна. “Уур амьсгалын өөрчлөлтийн эсрэг бид юу хийж чадах вэ?” сэдэвт энэ хурал нь цаг үеэ олсон арга хэмжээ болж байна. Энэ хурал хүүхдүүд, багш ажилтнуудад уур амьсгалын өөрчлөлт, цөлжилтийг сааруулахад өөрсдийн хийж чадах зүйл, нөөц, боломж, шинэлэг санаа, хуримтлуулсан арга туршлагаа харилцан солилцох талбар болж чадна гэдэгт итгэлтэй байна. Монголчууд “ хүүхдийн тус багаддаггүй ” гэж ярьдаг. Хүүхэд бүр, хүн бүр өөрийн амьдралын хэв маягт өөрчлөлт оруулж ус, цахилгаанаа хэмнэж, орчноо цэвэр ариун байлгаж хэвших нь л таны оруулж буй хамгийн энгийн бөгөөд бодит хувь нэмэр болох юм. Үүнд томчууд, эх эцэг эхчүүдийн үлгэр дуурайл ч нэн чухал.
Сургуулийн өмнөх болон ерөнхий боловсролын сургуулиудын сургалтын хөтөлбөрт экологийн боловсролын хичээлийг түлхүү оруулах талаар холбогдох яамдтай санал солилцон, хамтран ажиллаж байна. Уур амьсгалын өөрчлөлт, байгаль орчны доройтолд хүний зохисгүй үйл ажиллагаа хэрхэн нөлөөлж байгаа талаар хүүхдүүдийн мэдлэгийг нэмэгдүүлэхэд өөрийн ард түмний байгаль хамгаалах уламжлал, ёс заншилд сургахын зэрэгцээ хүүхдийн сэтгэл зүй, сонирхол, насны онцлогт тохируулсан мэдээллийг хэвлэл мэдээллийн хэрэгсэл, интернэт зэрэг орчин үеийн арга хэрэгслийг ашиглан сонирхолтой байдлаар хүргэх нь илүү өгөөжтэй байх болно. Өнөөдрийн хүүхдүүд улс орны ирээдүйн эзэд юм. Хүүхэд ахуй цагаасаа байгаль орчноо хамгаалах талаар зөв ойлголттой болж өссөн хүүхдүүд ирээдүйд зөв шийдвэр гаргах нь дамжиггүй. Тийм учраас та бүхний хийж буй энэ үйл ажиллагаа цаад утгаараа ирээдүйд хийж буй асар том хөрөнгө оруулалт юм” хэмээлээ.
Монголын Зуслангуудын холбоо, “Найрамдал” зуслангаас зохион байгуулж байгаа олон улсын бага хурлын нээлтийн нэгдсэн хуралдаанд БОАЖЯ-ны экологийн цэвэр технологи, шинжлэх ухааны хэлтсийн дарга А.Энхбат “Дэлхийн дулаарал ба Монголын экологийн хямрал”, Монголын зуслангуудын холбооны ерөнхийлөгч, олон улсын хүүхдийн “Найрамдал” төвийн ерөнхий захирал Т.Түвшин “Дэлхийн дулаарал, уур амьсгалын өөрчлөлтийн эсрэг хөдөлгөөнд хүүхдийн зуслангийн оролцоо”, Швейцарийн хөгжлийн агентлагийн цөлжилтийг сааруулах төслийн удирдагч Г.Даваадорж “Дэлхийн дулаарал, уур амьсгалын өөрчлөлтийн эсрэг хүүхдүүд юу хийж болох вэ? Бидэнд ийм боломж байна”, “АДРА-Монгол” байгууллагын гамшгийн менежментийн хөтөлбөрийн зохицуулагч Жерард Ганаба “Уур амьсгалын өөрчлөлт ба хүүхэд”, “Хобби” сургуулийн 10 дугаар ангийн сурагч Ж.Болор “ЕБС-ийн байгаль экологийн хичээлээр олгож буй мэдлэг” илтгэл тус тус тавьж, уур амьсгалын өөрчлөлтийн эсрэг хүүхдүүд юу хийх боломж байгаа талаар дурьдав. Хуралдаанд Австрали, Англи, БНХАУ, ОХУ, Сингапур, Шинэ Зеланд, Японы төлөөлөгчид оролцож байна.
