Монгол Улсын Ерөнхийлөгч Цахиагийн Элбэгдорж АНУ-д албан ёсны айлчлал эхэллээ. Тэрээр айлчлалынхаа эхний өдөр тус улсын Сан Франциско хотод хүрэлцэн ирэв. Ерөнхийлөгч Ц.Элбэгдорж айлчлалынхаа эхний өдөр Монгол-Америкийн харилцаа, хамтын ажиллагааны чухал бүс болох Калифорни муж, түүний дөрөвдэх том хот болох Сан Франциско болон зэргэлдээх газар нутагт оршин сууж байгаа монголчуудтайгаа уулзаж байгаа нь санамсаргүй хэрэг биш юм.
7.2 сая хүн амтай тус хот банк санхүү, соёл урлаг, ачаа тээврийн томоохон төв болж хөгжиж байна. Олон улсын банк санхүүгийн томоохон корпорациудын төвүүд энд байрлаж, аялал жуулчлал хөгжихийн хэрээр суурьшин амьдрах гадны иргэдийн тоо ч нэмэгдэж байгаа юм байна.
“Баруун эрэг бол Монгол-Америкийн харилцааны асар том боломжийг агуулж байгаа бүс нутаг юм. Бид энэ боломжийг бүрэн дүүрэн ашиглахыг хүсч байна. Иймээс ч байнгын ажиллагаатай консулын газар байгуулах шийдвэр гарч, Монгол Улсын Ерөнхийлөгчийн айлчлалын үеэр нээх гэж байна. Сан Франциско дахь Монголчуудын холбоо бол АНУ –д үйл ажиллагаагаа явуулж байгаа хамгийн идэвхтэй холбоодын нэг. Энд амьдарч байгаа монголчуудаараа бахархах зүйл олон бий. Энэ бүхнийг харж үзэж Монгол Улсын Ерөнхийлөгч айлчлалаа Сан Францискогоос эхэлж байгаад талархаж байна” хэмээн Монгол Улсаас АНУ-д суух Онц бөгөөд Бүрэн эрхт Элчин сайд Х.Бэхбат уулзалтыг нээхдээ хэлэв.
Дараа нь Ерөнхийлөгч Ц.Элбэгдорж хийж хэрэгжүүлж байгаа бодлого үйл ажиллагаагаа товч танилцуулж, иргэдийн сонирхсон асуултад хариуллаа.
Газар газрын монголчуудын санааг зовоож байдаг, шийдлээ хүлээж байгаа олон асуудлууд энэ уулзалтын үеэр ч мөн хөндөгдөж байлаа. Тухайлбал гадаадад байгаа монголчуудад сонгуульд саналаа өгдөг байх эрхийг хуулиар баталгаажуулах, давхар иргэншилийн асуудлыг монгол иргэддээ нааштайгаар шийдэх, гадаадын их дээд сургуулиудад засгийн газрын тэтгэлгээр сургах асуудлыг ил тод нээлттэй, хүртээмжтэй болгох, ажлын байрны төлөөх шударга өрсөлдөөн бий болох нөхцлийг төрөөс бүрдүүлэх гэх мэт асуудлуудын талаар харилцан ярилцав.
Уул уурхайн баялгийн зөв хуваарилалт, шударга сонгуулийн тогтолцоо, агаарын бохирдол, байгал орчны асуудлуудад ч мөн гадаадад ажиллаж амьдарч байгаа монголчууд , эх орондоо байгаа монгол иргэдийн нэгэн адил сэтгэл зовж, санаа тавьж байдаг нь энэ уулзалтаас харагдаж байлаа.
Шийдвэр гаргах явц дахь иргэдийн оролцоог нэмэгдүүлэх, хууль шүүхийн байгууллагын шинэчлэл зэрэг чиглэлээр хийж хэрэгжүүлж байгаа Ерөнхийлөгчийн бодлого үйл ажиллагааг дэмжиж байгаагаа иргэд илэрхийлж байсан.
АНУ дахь монголчуудын эрхлэн гаргадаг “Замдаан”сонины эрхлэгч Д.Цэрэндорж хэлэхдээ, Ерөнхийлөгчийн санаачилгаар байгуулагдсан “Иргэний танхим”-ыг байгуулах ажил АНУ-д ч идэвхжиж байна. Вашингтон, Сан Франциско, Сиэтл гэхчилэн олон том хотуудад иргэний танхим байгуулагдсан. Их хурлаар сонгуулийн тухай хууль хэлэлцэх гэж байгаатай холбогдуулан бид хилийн чанадаас сонгох сонгогдох эрхийн талаар хэлэлцэж байна. Энэ асуудлаар бид санал асуулга явуулсан. 832 монгол иргэн оролцлоо гээд санал асуулгыг дүнг гардуулан өглөө.
Уулзалтад 600 орчим монгол иргэд оролцлоо.
