Монголын Үйлдвэрчний эвлэлийн ХХ Их хуралд оролцогчдод
Монгол Улсын ард иргэдийг сэтгэл хангалуун хөдөлмөрлөх нөхцөл бололцоог хангахад зорилго, үйл ажиллагаагаа чиглүүлэн ажиллаж байгаа нийгмийн зөвшилцлийн чухал бүрэлдэхүүн хэсэг болсон Монголын Үйлдвэрчний эвлэлийн мянга мянган гишүүд, дэмжигчид болон тэднийг төлөөлөн энэхүү Их хуралд оролцож байгаа Та бүхэнд чин сэтгэлийн халуун мэндчилгээ дэвшүүлж, хөгжлийн хөдөлгөгч хүчин болсон хүмүүсийн сайн сайхны төлөө зүтгэж байгаа эрхэм сайн үйлсдээ өндөр амжилт гаргахыг хүсэн ерөөе.
Монголын Үйлдвэрчний эвлэлийн холбоо нь сүүлийн жилүүдэд үйл ажиллагааныхаа цар хүрээг өргөтгөн өөрийн гишүүн байгууллагууд, хөдөлмөрчид, ард иргэдийн санал хүсэлт, дуу хоолойг төр засагтаа хүргэх чиглэлээр идэвхи санаачилгатай ажиллаж байна. Ажлын байрыг шинээр бий болгох, ажилтан, албан хаагчдын цалин хөлсийг нэмэгдүүлэх, нийгмийн болон эрүүл мэндийн даатгалын тогтолцоог шинэчлэх, иргэдийн хөрөнгийг хамгаалах зэрэг нийгэмд хамгийн ихээр тулгамдаад байгаа асуудлуудыг шийдвэрлэхээр хүчин чармайлт тавин ажиллаж байгаад талархаж байна.
Манай төр засаг бодлого, үйл ажиллагаандаа Үйлдвэрчний эвлэлийн тавьсан шаардлага хүсэлтийг тусган, нийгэмд тулгарч байгаа асуудлуудыг хамтран шийдвэрлэж эхлээд байна. Хөдөлмөрийн хөлсний доод хэмжээг “Нийгмийн түншлэгч тал”-ууд анх удаа хэлэлцэн тогтоосон нь үүний илэрхийлэл боллоо.
Монголын Үйлдвэрчний эвлэлийн холбоо нь ард иргэдийг эрүүл, аюулгүй орчинд ажиллах эрх зүйн тогтолцоог сайжруулах, үйлдвэрлэл, ажлын байрны нөхцөлийг орчин үеийн стандарт шаардлагад нийцүүлэх, цалин хөлсний шударга хуваарилалтын тогтолцоог бэхжүүлэхийн төлөө хүч бололцоогоо дайчлан ажиллах хэрэгтэй.
Эх орноо хөгжүүлэхийн төлөө цуцалтгүй ажиллаж байгаа Монгол хүн бүрийн амьдрал нь аз жаргал, сайн сайхан бүхнээр гэрэлтэж, үргэлж өнгөлөг өөдрөг байх нь Үйлдвэрчний эвлэлийн явуулж байгаа бодлого, үйл ажиллагаагаар харагдах болно гэдгийг Та бүхэн ямагт санаж ажиллахыг Төрийн тэргүүний хувьд хүсэж байна.
Монголын үйлдвэрчний эвлэлийн ХХ Их хурлын үйл ажиллагаанд амжилт хүсье.
Монгол орон цэцэглэн хөгжих болтугай.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
Улаанбаатар хот 2011 оны 6 дугаар сарын 15-ны өдөр
