Монгол Улсын Ерөнхийлөгч Ц.Элбэгдорж 2009 оны 9 дүгээр сарын 13-ны өглөө БНЭУ-ыг зорьж, төрийн анхны айлчлалаа эхлүүлээ. Айлчлалын бүрэлдэхүүнд УИХ-ын гишүүн, Гадаад харилцааны сайд С.Батболд, Монгол Улсаас БНЭУ-д суух Онц бөгөөд бүрэн эрхт элчин сайд В.Энхболд, УИХ-ын гишүүн, Аюулгүй байдал, гадаад бодлогын байнгын хорооны дарга З.Энхболд, УИХ-ын гишүүн Монгол-Энэтхэгийн парламентын бүлгийн дарга Д.Одбаяр, БСШУ-ны сайд Ё.Отгонбаяр, Ерөнхийлөгчийн Тамгын газрын дарга Д.Дорлигжав, Ерөнхийлөгчийн Үндэсний аюулгүй байдлын бодлогын зөвлөх М.Батчимэг, Олон нийтийн харилцаа, нийтлэг бодлогын зөвлөх А.Ганбаатар нарын албаны хүмүүс болон 40 гаруй бизнес эрхлэгчид дагалдан явлаа.
Манай оюуны соёлын өнө эртний хөрш Энэтхэг Улсад хийж буй тус айлчлалын үеэр Эрүүл мэндийн салбарт хамтран ажиллах тухай хэлэлцээр, Статистикийн салбарт хамтран ажиллах тухай санамж бичиг, Тогтворжуулалтын зээлийн тухай хэлэлцээр, 2009-2011 оны Соёлын солилцооны хөтөлбөр, Цөмийн эрчим хүчийг энх тайвны зорилгоор ашиглахад хамтран ажиллах тухай хэлэлцээр зэрэг баримт бичгүүдэд гарын үсэг зурах бөгөөд айлчлалын хөтөлбөрийн дагуу БНЭУ-ын түүхт соёлын дурсгалт газруудтай танилцах ажээ.
