АНУ-ын Сенат Монгол Улсын Ерөнхийлөгч Ц.Элбэгдоржийн айлчлалын ач холбогдлыг үнэлж тогтоол батлав
Монгол Улсын Ерөнхийлөгч Ц.Элбэгдорж АНУ-д албан ёсны айлчлал хийж байгаатай холбогдуулан АНУ-ын хууль тогтоох дээд байгууллага Конгрессийн дээд танхим Сенат 2011 оны 06 дугаар сарын 16-ны өдөр дараах тогтоол гаргасан байна.
АНУ-ын 112 дугаар Конгрессийн 1-р хуралдааны Сенатын 208 дугаар тогтоол
СЕНАТЫН ТОГТООЛ
Монгол Улсын Ерөнхийлөгч Цахиагийн Элбэгдоржийн Вашингтон хотноо хийсэн айлчлал Америкийн Нэгдсэн Улс, Монгол Улсын хооронд өсөн нэмэгдэж буй түншлэлийг гүнзгийрүүлэхэд чухал үүрэг гүйцэтгэж буй тухай
Ноён Керри болон ноён Маккейн, хатагтай Мурковски, ноён Вэбб нарын хамт дараах тогтоолыг Сенатын Хороонд танилцуулахаар өргөн барив. Үүнд:
СЕНАТЫН ТОГТООЛ
Монгол Улсын Ерөнхийлөгч Цахиагийн Элбэгдорж Вашингтон хотноо хийсэн айлчлал нь Америкийн Нэгдсэн Улс, Монгол Улсын хооронд өсөн нэмэгдэж буй түншлэлийг гүнзгийрүүлэхэд чухал үүрэг гүйцэтгэж байгааг АНУ-ын Сенат дэмжиж, энэхүү тогтоолыг гаргав.
Америкийн Нэгдсэн Улсын Засгийн газар Монгол Улсын Засгийн газартай 1987 онд дипломат харилцаа тогтоож, улмаар 1988 онд Улаанбаатар хотноо Элчин сайдын яамаа нээсэн тул;
Монгол Улсын Засгийн газар 1990 онд нэг намын коммунист засаглалыг халсанаа тунхаглаж, ардчилал, зах зээлийн өөрчлөлт шинэчлэлийг эхлүүлсэн тул;
Ашиг сонирхол, үнэт зүйлс дээрээ тулгуурлан Америкийн Нэгдсэн Улсын Засгийн газар Монгол Улсад өрнөж буй эдийн засаг, улс төрийн өөрчлөлт шинэчлэлийг тууштай дэмжиж, 1991 оноос хойш эхлэн дорвитой хувь нэмэр оруулсан тул;
Америкийн Нэгдсэн Улс 1991 онд (1) Монгол Улстай Худалдааны хэвийн харилцааны дэглэм тогтоож, (2) Энх тайвны корпусын хөтөлбөрийг Монгол Улсад хэрэгжүүлснээр 1991 оноос хойш тус улсад нийт 869 сайн дурын ажилтнууд ажиллаж байгаа тул;
АНУ 1999 оноос эхлэн худалдааны хэвийн дэглэмийг байнгын болгож өргөжүүлсэн тул;
Олон улсын валютын сан, Дэлхийн банк, Азийн хөгжлийн банк, Европын сэргээн босголт, хөгжлийн банк болон олон улсын бусад байгууллага дахь Монгол Улсын Засгийн газрын оролцоо нэмэгдсэн тул;
“Ардчиллын түншлэлийн хөтөлбөр” нь 2007 оноос эхлэн ил тод байдал, хууль тогтоох засаглалын бие даасан байдал, мэдээлэл чөлөөтэй авах, төр засгийн хяналтыг дэмжих чиглэлээр Улсын Их Хуралд парламентын туслалцаа үзүүлж эхэлсэн тул;
Монголын ард түмэн 2009 оны 5 дугаар сарын 24-нд чөлөөтэй, шударга, тайван сонгууль явуулсанаар сөрөг хүчин болох Ардчилсан намаас нэр дэвшсэн Цахиагийн Элбэгдорж сонгогдсон тул;
Монгол Улс 2011 оны 7 дугаар сараас эхлэн хоёр жилийн хугацаанд Ардчилсан орнуудын хамтын нийгэмлэгийг даргалах тул;
Монгол Улс Ардчилсан орнуудын хамтын нийгэмлэгийн Сайд нарын 7 дугаар уулзалтыг Улаанбаатар хотноо 2013 онд зохион байгуулах тул;
Монгол Улсын Засгийн газар Америкийн Нэгдсэн Улсын Засгийн газартай хамтран терроризмын эсрэг үргэлжлүүлэн тэмцэж байгаа тул;
Монгол Улс 2003 – 2008 онд 990 орчим цэргийн алба хаагчийг Иракт илгээсэн ба одоогийн байдлаар Монголын 190 цэргийн алба хаагч Афганистанд алба хааж байгаа тул;
Монгол Улсын Засгийн газар 2010 онд НҮБ-ын 2 дугаар түвшний эмнэлгийг Судан Улсын Дарфур хотод илгээсэн тул;
Монгол Улсын Засгийн газар (1) Сьерра-Леоне дахь Тусгай шүүхийн хамгаалалт, (2) Косово дахь Хойд Атлантын Гэрээний Байгууллага (НАТО)-ын ажиллагаа, (3) Африкийн зарим оронд НҮБ-ын үйл ажиллагааг дэмжиж, цэргийн бие бүрэлдэхүүнээ илгээх замаар олон улсын энхийг сахиулах ажиллагааг идэвхтэй дэмжиж ирсэн тул;
Монгол Улсын Засгийн газар Аляскийн Үндэсний Гвардитай хүмүүнлэгийн болон энхийг сахиулах үйл ажиллагаа зэрэг амжилттай түншлэлийг 2003 оноос хөгжүүлж байгаа тул;
АНУ-ын Засгийн газар болон Монгол Улсын Засгийн газар нь Зүүн Хойд Ази, Төв Азийн бүс нутагт энх тайван, тогтвортой байдлыг хангах нийтлэг ашиг сонирхолтой байгаа тул;
Монгол Улсын Засгийн газар нутаг дэвсгэрээ Цөмийн зэвсгээс ангид бүс хэмээн зарлаж, 1991 болон 1992 онд холбогдох баримт бичгүүдийг батлан гаргасан тул;
Монгол Улс нь 2010 онд Олон улсын атомын эрчим хүчний агентлагийн удирдах зөвлөлийн дарга болсон тул;
Цөмийн эрчим хүчийг энхийн зорилгоор ашиглах салбарын хамтын ажиллагааг дэмжих тухай Санамж бичгийг Америкийн Нэгдсэн Улс, Монгол Улсын хооронд 2010 онд байгуулсан тул;
АНУ-ын Цөмийн аюулгүй байдлын газар, Монгол Улсын Засгийн газрын Цөмийн энергийн газартай хамтран болзошгүй террорист халдлагад хариу үзүүлэх механизмын сургалт амжилттай зохион байгуулсан тул;
Америкийн Нэгдсэн Улсын Засгийн газар 1991 – 2011 онд Монгол Улсад (1) бизнес, санхүүгийн зах зээл, үүний дотор уул уурхайн салбарын хууль, эрх зүйн орчныг сайжруулах, (2) Хүлэмжийн хийн ялгаралтыг багасгах, (3) Сайн засаглалын хөтөлбөрийг дэмжих зэрэг чиглэлээр туслалцаа үзүүлж ирсэн тул;
Эдийн засгийн тогтвортой өсөлтийг дэмжих, ядуурлыг бууруулах зорилгоор Мянганы сорилтын корпораци Монгол Улстай 2007 онд гэрээ байгуулж, хөрөнгийн эрх, мэргэжлийн боловсрол сургалт, эрүүл мэнд, зам, эрчим хүч, байгаль орчинд анхаарлаа хандуулан ажиллаж байгаа тул;
Монгол Улс нь төмөр замын дэд бүтцээ өргөжүүлэх нь худалдаа, хөрөнгө оруулалтын түншүүдийг төрөлжүүлэх, эрдэс баялгийн экспортын шинэ зах зээлүүдийг нээн Ази, Европыг холбосон гүүр болох тул;
АНУ-ын зүгээс (1) дэлхийн эдийн засгийн хямралын нөлөөг бууруулах, (2) эдийн засаг, худалдаа, эрчим хүчний, ялангуяа банк, уул уурхайн салбарт зохистой бодлогыг хангах, (3) арилжаа, худалдааны хуулийг боловсронгуй болгохыг дэмжих, (4) энхийг сахиулах болон зэвсэгт хүчний хамтын ажиллагаагаа өргөжүүлэн хөгжүүлэхэд Монгол Улсад туслалцаа үзүүлж ирсэн тул;
2010 оны нэгдүгээр сард (1) АНУ-ын Засгийн газар, Монгол Улсын Засгийн газар боловсролын солилцооны боломжийг нэмэгдүүлэхээр тохиролцсон, (2) Монгол Улсын Боловсрол, соёл, шинжлэх ухааны яам АНУ – Монгол Улсын Фүүлбрайтын хөтөлбөрт санхүүгийн дэмжлэг үзүүлэхээ амалсан, (3) АНУ-ын Төрийн департамент АНУ – Монгол Улсын Фүүлбрайт хөтөлбөрт олгох төсвийн хуваарилалтыг 2010 оны санхүүгийн жилд нэмэгдүүлэхээ мэдэгдсэн тул;
Монгол Улс нь 2011 онд тусгаар тогтнолын 100 жилийн ойг тэмдэглэх тул;
Монгол Улсын Ерөнхийлөгч Ц.Элбэгдорж АНУ-д хийж буй албан ёсны айлчлалынхаа үеэр 2011 оны 6 дугаар сарын 16-нд АНУ-ын Ерөнхийлөгч Барак Обама, Конгрессын удирдлага, эрдэмтэн, профессорууд болон бизнесийн төлөөлөлтэй уулзах тул;
Нийтлэг ашиг сонирхол, үнэт зүйлсээ онцлон тунхаглах зорилгоор АНУ-ын Дэд Ерөнхийлөгч Жозеф Байдэн Монгол Улсад 2011 оны сүүлээр айлчлахаар төлөвлөсөн тул;
СЕНАТ ДАРААХ ЗҮЙЛИЙГ ТОГТООВ.
Нэгдүгээрт, Монгол Улсын Ерөнхийлөгч Цахиагийн Элбэгдоржийн Вашингтон хотноо хийж буй түүхэн айлчлал нь АНУ, Монгол Улсын төр засаг, ард түмний хоорондын өргөжиж буй найрамдлыг бэхжүүлж байна;
Хоёрдугаарт, Монголын ард түмэн хийгээд Монгол Улсын Засгийн газар ардчилсан өөрчлөлт, шинэчлэлийг гүнзгийрүүлэх, ил тод байдал, хууль ёсыг бэхжүүлэх, хөрөнгө оруулалтыг хамгаалах талаар хийж буй алхмуудыг сайшаан дэмжив;
Гуравдугаарт, АНУ-ын Засгийн газар нь (А) эдийн засгийн хамтын ажиллагааг өргөжүүлэн үргэлжлүүлэх, (B) хоёр орны хөгжил цэцэглэлтийг хангах зорилгоор хөрөнгө оруулалт, худалдааг нэмэгдүүлэх дараагийн алхмуудыг авах нь зүйтэй;
Дөрөвдүгээрт, эдийн засгийн тогтолцоогоо сайжруулж, хөгжлөө хурдасгах зорилгоор Монгол Улсын Засгийн газар нь Олон улсын валютын сан, Дэлхийн банк, Азийн хөгжлийн банк болон Европын Сэргээн босголт, хөгжлийн банктай хамтран ажиллахад нь АНУ-ын Засгийн газар үргэлжлүүлэн дэмжих нь зүйтэй;
Тавдугаарт, Монгол Улстай хөгжүүлж буй боловсрол, соёл, иргэд хоорондын харилцаа, солилцоог АНУ-ын Засгийн газар үргэлжлүүлэн өргөтгөх нь зүйтэй.
