Монгол Улсын Ерөнхийлөгч Ц.Элбэгдорж АНУ-д албан ёсны айлчлалаа дуусгаад өнөөдөр эх орондоо буцаж ирлээ. Ерөнхийлөгч Ц.Элбэгдорж АНУ-д тус улсын Ерөнхийлөгч Б.Обаматай хэлэлцээ хийсэн бөгөөд хоёр тал худалдаа, эдийн засгийн харилцааг өргөжүүлэх, хамтын ажиллагааг эрчимжүүлэх хэрэгтэй гэдэг дээр санал нэг байгаагаа илэрхийлсэн юм. Ингэхдээ ил тод байдлын гэрээг энэ ондоо багтааж байгуулах нь чухал гэж үзлээ.
Монгол Улсын Ерөнхийлөгч Цахиагийн Элбэгдорж, Америкийн Нэгдсэн Улсын Ерөнхийлөгч Барак Обама нар хамтарсан мэдэгдэл хийхдээ “Монгол Улс, АНУ хоёр нийтлэг сонирхолд суурилсан иж бүрэн түншлэлийн харилцааг хөгжүүлэхийн төлөө байна хэмээгээд даян дэлхийд эрх чөлөө, ардчилал, хүний эрхийг хамгаалан бататгах ижил сонирхолтойгоо илэрхийлэхийн хамт худалдаа, хөрөнгө оруулалт, иргэд хоорондын харилцаа холбоог улам бэхжүүлснээр эдийн засгийн өсөлтийг хангаж, хоёр ард түмний хооронд найрамдалт харилцаа улам бэхжинэ” гэдгийг онцлон тэмдэглэжээ.
АНУ-ын Ерөнхийлөгч Б.Обама Монгол Улсын Ерөнхийлөгчтэй уулзахдаа “Монгол Улс ардчилсан нийгмийг сонгосноос хойш 20 жилийн энэ богино хугацаанд хүний эрх, эрх чөлөөг хангах, ардчиллыг бэхжүүлэх, эдийн засгаа хөгжүүлэх чиглэлд олсон амжилтыг би гайхан биширч байдаг. Ерөнхийлөгч Таны улс төрийн тавцанд хэрхэн гарсан, шийдвэр гаргахад оролцож байсан, улс орноо удирдаж байгаа түүхээр би мөн бахархаж байна. Хүний эрх, эрх чөлөөг дээдлэх, байгаль орчныг хамгаалах чиглэлээр Таны гаргаж байгаа санаачилгууд үнэлэхгүй байхын аргагүй юм” хэмээн тэмдэглэсэн байна. Тэрээр Монгол Улс ардчиллын төлөө хамтын нийгэмлэгийг энэ оноос даргалах гэж байгааг талархан хүлээж авч байна, дэмжиж ажиллах болно гэжээ.
Мөн АНУ-ын Азийн нийгэмлэг Монгол Улсын Ерөнхийлөгч Ц.Элбэгдоржид 2011 оны “Төрийн гарамгай зүтгэлтэн” шагналаа олголоо.
Энэ бүхэн Монгол Улсын Ерөнхийлөгчийн айлчлалд АНУ ихээхэн ач холбогдол өгч байгаагийн илрэл төдийгүй хоёр тал харилцаа, хамтын ажиллагаагаа цаашид улам бэхжүүлэн өргөжүүлэх улс төрийн шийдэлд дээд түвшинд хүрснийг харуулж байна.
