Украин Улсад төрийн айлчлал хийж буй Монгол Улсын Ерөнхийлөгч Цахиагийн Элбэгдорж, гэргий Хажидсүрэнгийн Болормаа нар 2011 оны 6 дугаар сарын 29-нд Киев хот дахь Нэр нь үл мэдэгдэх дайчдын хөшөөнд цэцэг өргөлөө. Дараа нь Монгол Улсын Ерөнхийлөгчийг албан ёсоор угтах ёслол Украины Ерөнхийлөгчийн ордонд болов.
Монгол Улсын Ерөнхийлөгч Ц.Элбэгдорж, Украин Улсын Ерөнхийлөгч В.Ф.Янукович нар ганцаарчлан уулзаж, хоёр орны харилцааны асуудлаар санал солилцлоо. Ганцаарчилсан уулзалтын дараа хоёр Ерөнхийлөгч өргөтгөсөн хэлэлцээ хийв.
Монгол Улсын Ерөнхийлөгч Ц.Элбэгдорж найрсаг дотноор хүлээн авч байгаа Украины ард түмэнд болон Ерөнхийлөгч В.Ф.Януковичид талархаад хоёр орны уламжлалт найрсаг харилцааг бүх салбарт өргөжүүлэн хөгжүүлэх хүсэл эрмэлзэлтэйгээ илэрхийлэв.
“Манай хоёр улс хөдөө аж ахуй, боловсрол, хүмүүнлэгийн салбарт хамтын ажиллагааны уламжлалтай бөгөөд түүнийгээ сэргээж хөгжүүлэх боломжтой. Бид танай улстай хөдөө аж ахуй, машин тоног төхөөрөмжийн үйлдвэрлэл, эрчим хүч, уул уурхай, барилга болон боловсролын салбарт хамтын ажиллагаа хөгжүүлж эрчимжүүлэх сонирхолтой байна. Худалдаа эргэлтийг нэмэгдүүлэх нь хамтын ажиллагааны нэн тэргүүний зорилт юм. Манай хоёр улс аль аль нь Олон улсын худалдааны байгууллагын гишүүн орон учраас энэ хүрээнд худалдааг нэмэгдүүлэх яриа хэлцлүүдийг идэвхжүүлэх боломжтой. Энэ талаар Засгийн газар хоорондын комиссын ярьж хэлэлцэж буй ажлуудыг үр дүнтэй болгох нь чухал. Энэ айлчлалын хүрээнд Украины талтай худалдаа, бизнес эрхлэх сонирхолтой монголын бизнес эрхлэгчид олон ирлээ. Тэд украины талтай бизнесийн хэлхээ холбоо тогтоож, харилцан ашигтай гэрээ хэлцлүүдийг хийнэ гэдэгт итгэлтэй байна.
Манай улсын олон зуун шилдэг сэхээтэн, боловсон хүчин Украинд дээд боловсрол эзэмшсэн. Энэ нь хоёр орны харилцааг өргөжүүлэн хөгжүүлэх сайхан суурь болно. Цаашдаа украинд сурах оюутны тоог нэмэгдүүлэх хүсэлтэй байна. Ялангуяа манай улсад өсөн нэмэгдэж буй хэрэгцээ, шаардлагыг харгалзан цөмийн эрчим хүч, хөдөө аж ахуй, технологийн чиглэлээр сургах сонирхолтой байна. Түүнчлэн хоёр улсад харилцан ЭСЯ нээж ажиллуулах нь манай хоёр орны харилцаанд чухал ач холбогдолтой болох юм” хэмээн Ерөнхийлөгч ярив.
Ерөнхийлөгч В.Ф.Янукович Украин Улсад Төрийн айлчлалаа амжилттай хийж буйд нь Монгол Улсын Ерөнхийлөгч Ц.Элбэгдоржид талархал илэрхийлээд, харилцаа, хамтын ажиллагааны асуудлаар илэрхийлсэн саналтай нь нэг байр суурьтай байгаагаа хэллээ.
“Хоёр орны харилцаа, хамтын ажиллагааг өргөжүүлэх чиглэлээр Та бид хоёрын ярьсан , санал солилцсон асуудлууд өнөөдөр баримт бичгүүдэд тусгалаа олж байгаад би сэтгэл хангалуун байна. Манай улс монголтой уул уурхай, ашигт малтмал, хөдөө аж ахуйн салбарт харилцан ашигтай хамтран ажиллах сонирхолтой. Монгол бол ашигт малтмалын томоохон нөөцтэй, харин бид олборлох боловсруулах өндөр технологитой.
Боловсролын салбарын хамтын ажиллагааг эрчимжүүлж, оюутны тоог нэмэгдүүлэх Таны саналыг бид хүлээн авч байна. Өнөөдрийн байдлаар манай улсын Засгийн газрын тэтгэлгээр монголын 20 оюутан сурч байна. Энэ тоог 10- аар нэмэгдүүлэхээр шийдвэрлэлээ.
Манай хоёр улсын хооронд өмнө зурагдсан баримт бичгүүдийн дагуу ажил хэргийг эрчимжүүлэх шаардлагатай гэж бодож байна. Хоёр улсад Элчин сайдын яам нээж ажиллуулах нь харилцаанд чухал үр нөлөөтэй байх болно гэдэгтэй санал нэг байна. ” гэлээ.
Хэлэлцээний үеэр хоёр орны харилцааны болон бус нутаг, олон улсын хэмжээний бусад асуудлаар санал солилцов. Өндөр дээд хэмжээний яриа хэлэлцээг тогтмолжуулах нь харилцаа хамтын ажиллагаанд чухал нөлөөтэй болохыг харилцан нотлов. Ерөнхийлөгчид аюулгүй байдал, батлан хамгаалах салбар дахь хоёр талын хамтын ажиллагааг идэвхжүүлэн хөгжүүлэхийг дэмжиж, Монгол, Украины цэрэг, техникийн хамтын ажиллагааны асуудал эрхэлсэн Засгийн газар хоорондын комиссын түвшинд дагнасан механизм байгуулах шаардлагатай гэж үзлээ.
Монголын мал аж ахуйн, украины газар тариалангийн туршлагыг харилцан солилцож, энэ чиглэлээр тодорхой ажил хийх, тухайлбал монголын байгаль, цаг агаарт тохирсон үр гаргах, хөдөө аж ахуйн тоног төхөөрөмжийг шинэчлэхэд украины талаас оролцох зэрэг асуудлаар ярилцав.
