БНЭУ-д Төрийн айлчлал хийж байгаа Монгол Улсын Ерөнхийлөгч Ц. Элбэгдорж гэргий Х.Болормаагийн хамт айлчлалынхаа гуравдахь өдрөө Энэтхэг улсын зарим түүхийн дурсгалт газрууд болон буддын шашны сүм хийдийг үзэж сонирхлоо.
Ертөнцийн долоон гайхамшгийн нэг Таж Махал сүмийг үзсэний дараа, буддын шашинд Эх дэлхийн таван ариун дагшин газруудын нэг гэгддэг Махабоди суваргад хүрэлцэн ирлээ.
Дэлхий дахинд нэр нь түгсэн ариун догшин газруудын нэг болох Бодгаяад энэ суварга байдаг бөгөөд, Шакъяамунни Гуатам энд гэгээрч бурхны хутгийг олсон гэгддэг юм.
Сүсэгтэн олны зорьж очдог энэ суваргын дэргэд Бодь мод байх бөгөөд, Бурхан багш энэ модны доор сууж гэгээрлийг олсон тухай домог байдаг. МЭ-ийн 393 онд Бодгаяад зорчсон даяанч лам Тансан ламын дурсамж тэмдэглэлийг үндэслэн Бодь модны ойр хавийг газрыг сэргээн тохижуулсан байна.
Дэлхийн хамгийн эртний буддын сургууль болох Наландатай энэ газрын нэр салшгүй холбоотой. Монголын лам нар Наландагийн Их сургуульд ирж суралцаж байсан төдийгүй, их сургуулиа дүүргээд тэндээ үлдэж багшилж байсныг даяанч ламын тэмдэглэлээс түүхчид олж тогтоожээ.
Дараа нь Монгол Улсын Ерөнхийлөгч Монгол лам нарын барьж байгуулж байгаа “Батцагаан” хийдээр зочиллоо. Дөрвөн жилийн өмнөөс эхлэн Монголын Бурхан шашинтны төв Гандантэгчинлэн хийдийн лам нарын санаачлагаар энэ хийдийг барьж эхэлжээ. Сүсэгтэн олны хандивын мөнгөөр барилгын ажлаа үндсэндээ дуусгасан, ирэх жил гэхэд Энэтхэг дэх Монгол хийд ашиглалтанд орно гэж Монголын Бурхан шашинтны төв Гандантэгчинлэн хийдийн хамба лам Д.Чойжамц танилцууллаа.
Өнөөдөр БНЭУ-д 200 орчим монгол лам нар бурхны хийдэд шавилан сууж байна.
