“Үндэсний морин уралдааны морь унаач хүүхдийн аюулгүй байдал” нээлттэй хэлэлцүүлэг өнөөдөр “Иргэний танхим”-д боллоо. Хэлэлцүүлгийг Алдарт эхийн одонт ээжүүдийн холбоо, Монголын морин спорт уяачдын холбоо, Ерөнхийлөгчийн дэргэдэх “Иргэний танхим” хамтран зохион байгуулсан юм.
Хэлэлцүүлэгт Алдарт эхийн одонт ээжүүдийн холбооны тэргүүн Б.Мөнхтуяа “Үндэсний морин уралдааны морь унаач хүүхдийн эрхийн асуудал”, Хүүхдийн төлөө газрын мэргэжилтэн Д.Энхтуяа “Үндэсний морин уралдааны морь унаач хүүхдийн хувцас, морины хэрэгсэлд тавих шаардлага, стандарт”, Монголын морин спорт уяачдын холбооны нарийн бичгийн дарга П.Сэргэлэн “Холбооноос хурдны морь унаач хүүхдүүдийн аюулгүй байдлыг хангах талаар авч буй арга хэмжээ” гэсэн сэдвээр мэдээлэл хийлээ. П.Сэргэлэн хэлэхдээ “Морин уралдааныг цаашид үндэсний уламжлалт соёл наадмын, морин спортын, бооцоот гэж ангилан, сүүлчийн төрөлд нь зөвхөн насанд хүрэгсэд унадаг байх хэлбэрээр хөгжүүлнэ. Хүүхэд амь нас, эрүүл мэндээрээ хохирох тохиолдол орон нутагт хэн дуртай нь хүүхдийн хамгаалалтын хувцасгүйгээр зориулалтын замгүй газар морин уралдаан зохион байгуулдагтай холбоотой. Манай холбоо хүүхдийн аюулгүй байдалд ихээхэн анхаарч байгаа. Ээж нарынхаа санал зөвлөгөөг цаашид ажилдаа тусгаж ажиллах болно” хэмээн хэллээ.
Дараа нь уралдааны морь унаач хүүхдүүдийн аюулгүй байдлын асуудлаар алдарт эхийн одонт ээжүүд, Хүүхэд хүүхдийн төлөө ТББ-ын хүүхдүүдийн саналыг сонсов.
Оролцогч ээжүүд, хүүхдүүд “Уяачдын холбооны орон нутгийн салбарууд болон Уралдааны морь унаач хүүхдүүдийн эрх ашгийг хамгаалах холбоо байгуулах, зөвхөн салбаруудад бүртгэлтэй хүүхдээр уралдааны морь унуулах, морь унах хүүхдийн аюулгүй байдлыг хангасан хувцас, малгай, хэрэгслийг өөрсдийн нь саналыг харгалзан бий болгох, үүнийг хэрэглэж буй эсэхийг шалгадаг комисс ажиллуулж, хангаагүй тохиолдолд уралдаанаас хасах, морь унасан хүүхэд бүрийн хөдөлмөрийг үнэлэх, амжилттай оролцогсдыг спортын зэрэг цолоор шагнах, хүүхдүүдийг даатгалд бүрэн хамруулах, эмээлгүй морь, 7 нас хүрээгүй хүүхдийг уралдаанд оролцохыг, өвөл, хаврын улиралд морь уралдуулахыг хориглох, амь нас, эрүүл мэндээрээ хохирсон хүүхэд, тэдний эцэг, эхэд тэтгэлэг тэтгэмж олгох асуудлуудыг хуульчилж өгөхийг санал болголоо. Түүнчлэн Алдарт эхийн одонтой ээжүүдийн холбоо, хэлэлцүүлэгт оролцогчдоос УИХ-ын эрхэм гишүүд болон морин спорт сонирхогч монгол эрчүүддээ хандан “Төрт ёсны монгол наадмаар хүж дэлхийн эрдэнэ болсон үрсээ хайрлан, хүлэг морьдынхоо шандасыг шалгаж, хөх тэнгэрийнхээ дор наадацгаая. Гийн гоо хадааж, наадамчин олноо баясгагч хүүхэд бүрийнхээ эрүүл мэнд, амь насыг хамгаалах боломжтой бүхнийг хуульчлан нийтээрээ мөрдөж сэтгэл тэнэгэр наадацгая” хэмээн уриалга гаргалаа.
