Монгол Улсын Ерөнхийлөгч Ц.Элбэгдорж, Зүүн Европын хамгийн эртний, нэр хүндтэй сургуулиудын нэг болох Вильнюсын Их Сургуульд зочлов. 1579 онд Польшийн хаан Стефан Батор \Баатар\-ын үүсгэн байгуулсан энэ сургууль зөвхөн сургууль төдийгүй, шинжлэх ухааны гол төв болж байна. Тус сургууль 13 факультет, 8 институт, 10 судалгааны төв, Литва Улсдаа хамгийн эртнийд тооцогддог номын сан, эмнэлэг, одон орон судлалын төв, ботаникийн хүрээлэн, Гэгээн Иоанны сүмтэй бүхэл бүтэн цогцолбор юм. Өнөөдрийн байдлаар 25 мянган оюутан суралцаж байна.
Тус сургуульд нэрт монголч эрдэмтэн Ю.Ковалевскийн судалгааны ажлууд, цуглуулгын бүтээлүүд хадгалагдаж байна. Хэл шинжлэлийн ухааны үүднээс монгол хэлийг судалсан тэрхүү нэрт эрдэмтэн өөрийн гараар олон боть, толь, хэлзүйн бүтээлүүд бичсэнээс цөөнгүй нь энд байдаг юм байна. Мөн дундад зууны үед хамаарах монголын газрын зураг, монголчуудын ахуй амьдрал, амьдрах зан үйлийн талаар бичсэн ном, бөөгийн болон бурхны шашны ном зохиолууд байна.
“Манай сургууль дээр Монгол Улсын Ерөнхийлөгчийн хувьд анх удаа ирж байгаа эрхэм Ерөнхийлөгч Та, Английн хатан хаан, Далай лам, Иоан Павел, Жак Ширак, Лаура Буш нарын адил бидний хүндэт зочдын тоог нэмж байна. Монгол бол хамгийн гайхалтай түүхтэйн адил хамгийн өргөн хүрээнд судлагдах сэдэв мөн” хэмээн сургуулийн удирдлага Ерөнхийлөгч Ц.Элбэгдоржийг хүндэтгэн хүлээн авах үеэрээ хэлэв.
Ерөнхийлөгчийн хүсэлт болгосноор, Вильнюсийн Их Сургуульд нэг монгол оюутан сургаж, мөн эрдэмтэн Ю.Ковалевскийн бүтээлийг судлах зорилгоор монгол судлалын чиглэлийн оюутан дадлага хийж, төлбөрийг Вильнюсийн Их Сургууль хариуцахаар боллоо.
