Монгол Улсын Ерөнхийлөгч Ц.Элбэгдоржид БНХАУ-ын Төрийн зөвлөлийн гишүүн, Нийгмийг аюулаас хамгаалахын сайд Мэн Зяньжу тэргүүтэй төлөөлөгчид өнөөдөр бараалхав. Монгол Улсын Ерөнхийлөгч Ц.Элбэгдорж хэлэхдээ “Хоёр орны харилцааг хөгжүүлэхэд өндөр дээд хэмжээний харилцан айлчлал маш чухал ач холбогдолтой. ҮАБЗ-ийн нарийн бичгийн дарга, Хууль зүй, дотоод хэргийн сайд нартай уулзаж, хоёр орны аюулгүй байдал, хил хамгаалалт, хууль хяналтын хамтын ажиллагааны өргөн хүрээтэй асуудлаар ярилцаж тохиролцсонд баяртай байна.
БНХАУ-ын дарга Ху Жинтаотай миний ярилцаж тохирсон зүйлүүдийг ажил хэрэг болгоход манай холбогдох байгууллагууд анхааран ажиллаж байгаа. Монгол, Хятадын харилцааг стратегийн түншлэлийн түвшинд хөгжүүлэхээр болсон нь чухал юм. Хоёр улсын Ерөнхий сайд нарын харилцан айлчлал ихээхэн ач холбогдолтой болж, бүх салбарт хамтын ажиллагаа амжилттай өрнөж байна. Монгол Улсын Ерөнхий сайдын айлчлалын үеэр ялтан солилцох гэрээ байгуулсан нь зөв зүйтэй алхам боллоо. Манай улсын иргэн Дамдин цаазаар авах ял шийтгүүлсэнтэй холбогдуулан Ху Жинтао даргад хүсэлт тавьсан. Энэ асуудлыг хууль журамдаа нийцүүлэн нааштай шийдвэрлэж өгөхийг хүсье. Иргэдийнхээ үндсэн эрх ашгийг хамгаалахын зэрэгцээ хоёр талын нутаг дэвсгэр дээр бие биеийн хууль ёсыг чанд сахин биелүүлэх ёстой. Энэ чиглэлээр та бүхний тохиролцсон зүйлийг ажил хэрэг болгоход дэмжлэг үзүүлэх болно” гэв.
Эдийн засгийн хамтын ажиллагаа өсөн хөгжихийн хэрээр гэмт хэрэг, ялангуяа хил дамнасан гэмт хэрэг гарч байна. Хоёр улсын аюулгүй байдал, хилийн амар тайван байдлын төлөө хамтран ажиллаж, иргэдийнхээ хууль ёсны эрх ашгийг хамгаалах нь хууль сахиулах байгууллагуудын чухал үүрэг юм. Засгийн газар хооронд гэмт хэрэгтэй тэмцэхэд хамтран ажиллах тухай хэлэлцээрт гарын үсэг зурж, Монголын хууль зүй, дотоод хэргийн байгууллагуудад таван сая юанийн техникийн буцалтгүй тусламж үзүүлэх нот бичиг солилцлоо хэмээн Мэн Зяньжу сайд хэллээ.
