Манай улсад айлчилж буй ЮНЕСКО-ийн Ерөнхий захирал хатагтай Ирина Бокова өнөөдөр Монгол Улсын Ерөнхийлөгчид бараалхаж, хүн төрөлхтөний соёлын биет өвийн жагсаалтад “Монгол Алтайн уулсын зураг”-ийг бүртгэсэн батламжийг гардуулан өглөө. “Монголчууд бол гайхалтай өв соёлтой, аугаа их түүхийг бүтээсэн ард түмэн. Хүн төрөлхтөнийг ялгаруулж, бас нэгтгэж байдаг соёлын өвийг хамгаалахад ЮНЕСКО-ийн оруулж буй хувь нэмэр үнэлж баршгүй юм. Монголын соёлын гайхамшиг болсон Наадам, болон Монгол Алтайн уулсын зургийг хүн төрөлхтөний соёлын биет өвд бүртгэж авсан тухай сайхан мэдээг түүхт ойнууд давхцаж байгаа баяраараа хүлээн авч, монголчууд баяртай байна” гэж Монгол Улсын Ерөнхийлөгч Ц.ЭЛБЭГДОРЖ хэллээ.
ЮНЕСКО-ийн Ерөнхий захирал хатагтай И.Бокова “ЮНЕСКО-г үнэлж хэлсэн таны үгэнд баярлалаа. Монгол, ЮНЕСКО-ийн харилцаа, хамтын ажиллагаа өнгөрсөн 50 жилийн хугацаанд олон чухал агуулгаар баяжиж, үр дүнтэй хөгжиж байгаад би баяртай байна. Монгол бол түүх соёлын агуу их өвтэй улс. Дэлхийн хүн төрөлхтөний биет болон биет бус өвд бүртгэлтэй Монголын өвийн жагсаалт нэгээр нэмэгдэж байна. Энэ дашрамд танай улс Ардчиллын хамтын нийгэмлэгүүдийг даргалах болсонд баяр хүргэж, амжилт хүсье ” гэв.
Ерөнхийлөгч Ц.Элбэгдорж, хатагтай И.Бокова нар Монгол, ЮНЕСКО-ийн хамтын ажиллагааны талаар санал солилцож, зарим тодорхой асуудлуудаар тохиролцлоо.
Тухайлбал, Ардчиллын боловсролыг дэмжих чиглэлээр олон улсын хэмжээний арга хэмжээ зохион байгуулахаар төлөвлөж байгаагаа Монгол Улсын Ерөнхийлөгч хэлж, ЮНЕСКО-ийн Ерөнхий захирал энэ санааг дэмжив.
Ерөнхийлөгч хэлэхдээ, “Монголчуудын хувьд ардчилал гэдэг шинэ зүйл биш. Эзэнт гүрний үед Их хаанаа овог аймгууд сонгож байсан түүхтэй. 20 жилийн өмнө улстөр, эдийн засгийн шинэчлэлийг нэгэн зэрэг хийж, ардчилсан нийгмийн тогтолцоонд шилжсэн энэ үйл явц амжилттай үргэлжилж, өнөөдөр дэлхийн олон оронд үлгэр жишээ болохуйц ардчиллыг хөгжүүлж байна хэмээн үнэлэгдэж байна.Монгол Улс , Дэлхийн Ардчиллын хамтын нийгэмлэгийг даргалах хүрээнд хэд хэдэн асуудлаар тусгайлан форум зохион байгуулахаар төлөвлөж байгаагийн нэг нь ардчиллын боловсрол юм. Энэ чиглэлээр ЮНЕСКО-той хамтран олон улсын хүрээнд хөтөлбөр, сургалт зохион байгуулах саналтай байна” гэсэн юм. Тэрээр мөн, ирэх 10-р сард АСЕМ-ын гишүүн орнуудын сайд нарын хүрээнд байгал орчин, усны сэдвээр олон улсын хурал Улаанбаатарт зохион байгуулахаар бэлтгэж байгаа талаар ярилаа. ” ЮНЕСКО нь соёлын төдийгүй байгалийн өвийг хамгаалахад онцгой анхаардгийн хувьд дэлхийн дулаарал, цаг агаарын өөрчлөлтийн сөрөг нөлөөллийг бууруулахад бидэнтэй хамтран ажиллана гэдэгт итгэж байна” гэж Ерөнхийлөгч хэлэв.
Хатагтай И.Бокова, монголчуудын өвөг дээдэс анхны төрт улсыг байгуулж байсан аугаа ойд хүндэтгэл үзүүлж Наадам үзэхээр ирсэнээ хэлж, Наадмыг сэтгэл догдлон хүлээж байна гэсэн юм.
НҮБ-ын Боловсрол, соёл, шинжлэх ухааны байгууллага-ЮНЕСКО-д Монгол Улс 1962 онд гишүүнээр элссэн бөгөөд, тус байгууллага эрдэм боловсрол түгээх, үндэстний соёл, зан заншил, урлаг, түүх соёлын өв болон байгал орчныг хамгаалах, технологийн дэвшилтэт ололтыг таниулах зэргээр улс орны нийгэм, боловсрол, соёлын хөгжлийн зорилтуудыг хэрэгжүүлэхэд дэмжлэг үзүүлсээр ирлээ. Өнөөдрийн байдлаар хүн төрөлхтөний биет болон биет бус өвийн жагсаалтад Монгол үндэстний баяр-Наадам, морин хуур, уртын дуу, монгол хөөмий, бий биелгээ, бүргэдийн ан, Орхоны хөндий, Увс нуурын ай сав бүртгэлтэй байдаг юм.
