Эрхэм хүндэт говь нутгийн иргэд ээ,
Эрхэм хүндэт зочид, хатагтай, ноёд оо !
Монголын тулгар төрийн 2220 жил, Их Монгол Улс байгуулагдсаны 805 жил, Үндэсний эрх чөлөөний хувьсгалын 100 жил, Ардын хувьсгалын 90 жилийн түүхэн ойтой таширлан уудам говь нутгийн түүхт 80 жилийн ойгоо тэмдэглэж байгаа нийт Өмнөговьчууддаа чин сэтгэлийн халуун мэндчилгээ дэвшүүлж, ажил хөдөлмөрийн өрнүүн их үйлсийн дээдийг ерөөе.
Монгол орныхоо үүдэн хоймор болсон өмнийн говь нутгийн ажилсаг, хөдөлмөрч ард иргэд маань улам бүр өнгөжин жавхаажиж, говь нутаг минь жилээс жилд хөгжил дэвшлийн шинэ шинэ алхаагаар алхаж, улс орныхоо хөгжлийн тулгуур болж байгаад миний бие баяртай байна.
Оюу толгой, Таван толгойн эрдэнэс баялаг, үлэг гүрвэлийн өлгий нутаг, үзэсгэлэнт сайхан байгалаараа дэлхийд гайхшруулж байгаа нь бидний бахархал мөн. Өмнөговь аймгийнхаа түүхэн ойг угтаж төрөлх нутгаа хөгжүүлэх “80 бүтээлч ажил” хэрэгжүүлэн аймаг, сумдынхаа бүтээн байгуулалт, уул уурхай, аялал жуулчлалын эрчимтэй хөгжил, дэд бүтэц, эрчим хүч, техник технологийн суурь боломж өргөжин тэлж, буянт мал сүрэг, хөрсөн доорх эрдэс баялаг болоод ажилсаг, бүтээлч хүн ардынхаа давуу талыг илүүтэй ашиглан “жишиг аймаг” болгох зорилго тавьж, нийт иргэдийнхээ ая тухтай амьдрах нөхцлийг бүрдүүлэхийн төлөө ажиллаж байгаа нь Та бүхний нөр их хөдөлмөр, идэвх санаачилгын үр дүн гэдгийг энд хэлэхэд мөн таатай байна.
Байгалийн баялгийг хамгаалах, нөхөн сэргээх, зохистой ашиглах бодлогын уялдааг сайжруулж, цөлжилтийг бууруулах, ойжуулах, мод тарих байгаль хамгаалахад иргэдийн оролцоог нэмэгдүүлж, бүх нийтийн хөдөлгөөн болгож байгаа нь бусад аймгуудад үлгэр дууриал болж байна.
Монгол Улсын Ерөнхийлөгчийн санаачилгаар анх байгуулагдсан “Иргэний танхим”-ын үйл ажиллагааг тус аймгийн удирдлага, иргэд халуунаар дэмжин “Иргэний танхим” байгуулж, иргэдийг төрийн үйл хэрэгт идэвхтэй оролцуулах ажлыг зохион байгуулж байна. Цаашдаа ч Өмнөговь аймаг орон нутгийн сайн засаглал, ард иргэдийнхээ оролцоогоор Монгол улсдаа тэргүүлэх жишиг аймаг болно гэдэгт би итгэж байна.
Иргэдийн оролцоог хангасан нээлттэй засаглал, эрдэс баялаг, аялал жуулчлал, уламжлалт мал аж ахуй, орчин цагийн боловсрол соёл, говь нутгийнхний ажилсаг хичээнгүй чанар бүхэн нь Өмнөговьчуудын хөгжлийн баталгаа юм.
Өмнөговьчууд Та бүхэндээ говь нутгаа хөгжүүлж, элбэг хангалуун, эвсэг найрсаг аж төрөхийн өлзийтэй ерөөлийг өргөн дэвшүүлье !
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011 оны 07 дугаар сарын 21
