Дархан-Уул аймгийн нийт иргэдэд
Эрхэм хүндэт Дарханчууд аа,
Монголын Тулгар төрийн 2220 жил, Их Монгол Улс байгуулагдсаны 805 жил, тусгаар тогтнолоо сэргээн тогтоосон Үндэсний эрх чөлөөний хувьсгалын 100 жил, Ардын хувьсгалын 90 жилийн түүхэн ойнууд давхацсан билэгшээлт жил 50 жилийнхээ ойн баярыг тэмдэглэж буй Дарханчууддаа, Дархан-Уул аймгийн нийт иргэдэд Монгол Улсын Ерөнхийлөгчийн хувьд чин сэтгэлийн халуун мэндчилгээ дэвшүүлье.
Монголчуудын тусгаар тогтнол, бүрэн эрхт байдлын төлөөх зуун зууны тэмцэл зүтгэлийн үр дүнд 20 дугаар зуунд хот тосгод, суурин амьдралын эх сурвалжийг тавих, аж үйлдвэр, соёл, шинжлэх ухааны томоохон төвүүдийг шинээр байгуулах шаардлага зүй ёсоор тавигдсан билээ.
Дарханчууд таван арваныг өртөөлж, төмөр замын жижиг зогсоолоос өдгөө Монгол Улсын аж үйлдвэр, соёл, боловсролын цогцолбор бүхий хоёр дахь том хотыг сүндэрлүүлжээ.
“Найрамдлын” хэмээн алдаршсан Дархан хотыг “Бурхантын хөндий”-д Монголчуудтай мөр зэрэгцэн тухайн үеийн ЗХУ, Унгар, Польш, Чехсловак, Болгар зэрэг орны барилгачид, мянга мянган цэрэг дайчид босгосон юм.
Дархан хот 20 дугаар зууны Монгол Улсын хөгжил цэцэглэлтийн түүчээ болж араасаа Эрдэнэт, Багануур, Бор-Өндөр, Хөтөл зэрэг уул уурхай, аж үйлдвэрийн томоохон цогцолборуудыг дагуулсан их бүтээн байгуулалтын хөдөлгөгч хүч нь болсон түүхтэй.
Миний бие Монгол Улсын Ерөнхийлөгчийн хувьд иргэн төвтэй бодлого, байгальд ээлтэй хөгжил, өрсөлдөх чадвартай Ардчилсан Монгол Улс гэсэн үйл ажиллагааныхаа хөтөлбөрийн хүрээнд орон нутгийн эрх мэдийг өргөжүүлэхээр ажиллаж байна. Ингэхдээ хууль, шүүхийн шинэчлэл хийж, шийдвэр гаргахад иргэдийн оролцоог ханган, шударга ёсыг тогтоох тогтолцооны төлөө ажиллаж байна.
Дарханчууд өөрийн хотдоо хүн, байгальд ээлтэй өндөр технологид суурилсан томоохон үйлдвэрүүдийг цогцлоон байгуулж, Монголдоо төдийгүй дэлхийд өрсөлдөх жишиг хот болохын төлөө хичээн ажиллах хэрэгтэй.
Та бүхэнд алсын хараатай зорилго, хөгжлийн цогц төлөвлөгөөтэй байж, шинэ шинэ өндөрлөгт хүрэхийн өлзийтэй ерөөлийг өргөн дэвшүүлье.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011оны 7 дугаар сарын 21-ны өдөр
