Хөвсгөл аймгийн 80 жилийн ойд
Эрхэм хүндэт Хөвсгөлчүүд ээ,
Эрхэм хүндэт зочид оо,
Монголын Тулгар төрийн 2220 жил, Их Монгол Улс байгуулагдсаны 805 жил, Тусгаар тогтнолоо сэргээн тогтоосон Үндэсний эрх чөлөөний хувьсгалын 100 жил, Ардын хувьсгалын 90 жилийн ой тус тус тохиосон эрхэм хүндэтгэлт 2011 онд Хөвсгөл аймаг байгуулагдсаны 80 жилийн түүхэн их ой тохиож буйд Та бүхэнд миний бие чин сэтгэлийн халуун мэндчилгээ дэвшүүлье.
Дөрвөн зүг найман зовхист сунайн тогтох эртний түүхт Монгол түмний маань үзэмжит байгалийн төгс цогцолбор болсон Хөвсгөл нутаг нь онгон дагшин байгаль, цэнхэрлэн сувдрах Хөвсгөл далай – ээжийнхээ элбэрэл хишигт шүтэж мянга мянганыг туулж, он оныг ирлэж ирсэн олон ястны өлгий нутаг билээ.
Буурал түүхийн анхдагч алдартнуудаараа бахархсан, улс эх орныхоо хөгжил дэвшил, их бүтээн байгууллалтад Хөвсгөл нутгийн иргэдийн оруулж буй хөдөлмөр бүтээлийг Монгол Улсын төр, засаг ямагт өндрөөр үнэлж байдгийг хэлэхэд таатай байна.
Найман арванаар өртөөлсөн нэгэн аймгийн түүх бол улс үндэстнийхээ хөгжлийн салшгүй нэгэн хэсэг билээ. Миний бие Монгол Улсын Ерөнхийлөгчийн хувьд өөрийн бодлого, мөрийн хөтөлбөрийнхөө хүрээнд иргэн төвтэй бодлого, байгальд ээлтэй хөгжил, өрсөлдөх чадвартай Ардчилсан Монгол Улсын амжилтыг иргэд олон нийтийнхээ хамтаар цогцлоон бүтээхийг эрхэм зорилгоо болгон ажиллаж байна.
Хууль шүүхийн шинэчлэл, шударга ёсыг тогтоох, иргэдийн оролцоог хангах, орон нутагт төсвийн эрх мэдлийг шилжүүлэх, иргэн хүн өөрийн амьдралдаа жинхэнэ эзэн нь байж чадах нийгмийн тогтолцооны төлөө бодлогоо хэрэгжүүлж байна.
Цаашид Хөвсгөл аймаг ч бас байгалийн тансаг үзэмжээрээ Монгол Улс, дэлхий дахинд гайхагддагийн нэгэн адилаар, тэртээ хорин нэгэн жилийн өмнө шинэ нийгмийн түүчээ болсон түүхэн улбаагаа өрнүүлэн Ардчилал, шударга ёсны загвар аймаг байхыг хүсэн ерөөе.
Нар хур тэгширсэн, энэ сайхан өдрүүдэд эрдэнэт хурдан хүлгийн тань уяа сойлго шавхарч, эрч хүчтэй бөхчүүдийн тань эр бяр жагсаж, эрхийн мэргэн харваачид нь онч мэргэн байж, Дэлгэрмөрнийхөө хөвөө, зүлэг ногоон талбайд дэнж хотойтол сайхан наадаарай.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
2011 оны 7 дугаар сарын 22
